Adil Şükürov: "İstədiklərimizi reallaşdıra bilmədik"

"Azarkeşlərin inamlarını görürük və çalışırıq ki, daha yaxşı oynayaq. Oyun başlayandan qollar buraxırıq. Bunun üzərində işləməliyik. Oyun olaraq rəqibdən geri qalmırıq. Gələcəyə baxacağıq".

Futbolxeber.az saytının məlumatına görə, bu sözləri "Kəpəz"in baş məşqçisi Adil Şükürov Azərbaycan Premyer Liqanın 18-ci turunda bu gün "Neftçi" ilə keçirilən oyundan (0:2) sonra mətbuat konfransında deyib.

O, futbolçularının epizodları dəyərləndirə bilməməsi haqda danışıb: "Bunun üzərində çox çalışmalıyıq. Futbolçularda ani diqqətsizliklər olur".

Baş məşqçi ilk əvəzetməni matçın 82-ci dəqiqəsində etməsini belə izah edib: "Belə oyunlarda gənc futbolçunu meydana buraxdıq. Əsas məqsədimiz Cavad Kərimov kimi oyunçuları qazanmaqdır. Hücumameyilli oyunçumuz təkcə Cavad idi".

Adil Şükürov komandasının qarşıya qoyduğu məqsədlərdən də danışıb:  "Əsas hədəfimiz Premyer Liqada qalmaqdır. Futbolçularımız bu gün bacardıqlarını edirlər. Futbolçular bu cür oynaya bilirlərsə, məncə, onlar özlərini inkişaf etdirə bilər. 1-2 oyunçu gətirməklə komandanı daha gücləndirməyə çalışacağıq. Bugünkü oyunda maksimumu edə bilmədik. Bu da təbiidir. İstəyirik ki, futbolçularımız ən yaxşısını etsinlər. "Neftçi" ilə matçda tam olaraq istədiklərimizi reallaşdıra bilmədik".