Arif Əsədov: “Qəbələ”nin futbolçularında döyüşkənlik çatışmır”

Millimizin məşqçisi Arif Əsədovun Futbolxeber.az saytına müsahibəsi

- Azərbaycan Premyer Liqasında 16-cı turunda keçirilən oyunları, qeydə alınan nəticələri necə dəyərləndirirsiz?

- Bu turun oyunları həm gözlənilən, həm də gözlənilməz nəticələrlə yadda qaldı. "Sumqayıt"la matçda “Qarabağ”ın favorit olduğu öncədən bilirdi. Amma belə hesab gözlənilməz oldu. Çünki "Sumqayıt" son zamanlar yaxşı oyun göstərirdi. Bu matçda ev sahibinin açıq futbol oynaması hesabın böyük olmasına gətirib çıxardı. "Qarabağ"ın oyunçularının ustalıq səviyyəsi, keyfiyyəti sayəsində boşluqlardan istifadə etdi. Ona görə 6 qol vura bildi. "Kəpəz"in "Qəbələ" ilə matçda oyunu maraqlı və gözlənilməz idi. Həmin matçda Emin Səfərovun qırmızı vərəqə alması görüşdə həlledici məqam oldu. "Kəpəz"in böyükhesablı qələbəsi onun açıq futbol oynamasından xəbər verir. Son zamanlar "Səbail" oyunçu qıtlığı ilə üzləşib. Odur ki, matçdan öncə favorit "Sabah" idi. Bu hesab proqnozlaşdırılmasa da, qələbənin "Sabah"ın tərəfdə olacağı məlum ehtimal edilirdi. "Zirə"nin "Araz-Naxçıvan"la oyunu maraqlı idi. Onların matçı "Qarabağ"la xal fərqinin artması baxımından vacib idi. Naxçıvan təmsilçisi də öz növbəsində son oyunlarda rəqibin gücündan asılı olmayaraq xal almağa qadir olduğunu göstərir. Sonda ədalətli nəticə heç-heçə oldu. "Neftçi" - "Turan Tovuz" oyunu daim gərgin keçir. Tovuz təmsilçisi hazırda eniş yaşayır. Düzdür, xal almağa yaxın olsalar da, sonda təcrübə öz sözünü dedi. "Neftçi" qələbə qazanaraq liderlər qrupuna yaxınlaşdı.

- "Qarabağ" yenidən qarşısıalınmaz təsir bağışlayır. Demək olar ki, artıq Ağdam klubu çempionluq mübarizəsində rəqibsiz irəliləyir?

- "Qarabağ" həm daxili çempionatda, həm də Avropa Liqasında uğurlu seriyasını davam etdirir. Komandada artıq balans yaranıb. Hər iki cəbhədə mübarizə aparmaq üçün bərabərsəviyyəli heyət var. Mənə elə gəlir ki, "Qarabağ" bu il də çempionluq yolunda ən real namizəddir.

- Son 2 tura qədər lider olan "Zirə"nin ardıcıl 3 matça qələbə qazana bilməməsini nə ilə əlaqələndirmək olar?

- "Zirə" ilk turlarda gözəçarpan futbol sərgiləyirdi. Son turlardadakı xal itkilərinə baxmayaraq, bu komanda 2-4-cü yerlər uğrunda mübarizə aparacaq. Komandanın buna potensialı var.

- Demək olar ki, artıq "Neftçi" və "Sabah" özünə gəlib?

- Bəli, artıq bu komandalar özlərinə gəliblər. Getdikcə ilk dördlükdə bu komandaları görəcəyik. Hər iki klub medallar uğrunda mübarizə aparacaq gücə malikdir.

- Sizcə, "Qəbələ"nin autsayder olmağına səbəb nədir?

- "Qəbələ" haqqında birmənalı nəsə demək olmur. Ötən il "Qəbələ" daha istəkli oyun nümayiş etdirirdi. Hazırkı heyətdə sanki o istək yoxdur. Futbolçularda döyüşkənlik çatışmır. Səbəblərini deyə bilmərəm. Lider oyunçular komandadan getdi, bunun da öz təsiri var. Bununla belə, meydançada 100 faiz oynayıb, can qoymaq həmişə lazımdır. Bu hal "Qəbələ"nin son oyunlarında görünmür. Komandanın bu vəziyyətdən çıxmaq üçün potensialı var.

Azad NURİYEV