Bilel Auaşeriya: “Niyə uduzuruq? Bunu anlamıram”

“Meydana qələbə üçün çıxmışdıq. Təəssüf ki, uduzduq. Məğlubiyyətin səbəbini izah etmək çətindir. Çünki nə deyəcəyimi bilmirəm”.

Futbolxeber.az saytına müsahibəsində bu sözləri “Qəbələ”nin yarımmüdafiəçisi Bilel Auaşeriya Azərbaycan Premyer Liqasının XII turunda “Neftçi”yə 0:2 hesabı ilə uduzduqları oyun barədə danışarkən deyib.

Fransız futbolçu komandada heç bir problem olmadığını bildirib: “Siz özünüz də oyuna tamaşa edirdiz. Konkret səbəb göstərmək mənim üçün çətindir. Komandada heç bir problem yoxdur. Hər şey qaydasındadır. Sadəcə niyə uduzuruq, bunu anlamıram”.

29 yaşlı yarımmüdafiəçi meydanda xarakter nümayiş etdirməmələri fikri ilə razılaşmayıb: “Mən belə deməzdim. Biz meydanda vuruşuruq, əlimizdən gələni edirik. Ardıcıl məğlubiyyətlərlə üzləşəndə uğursuzluq zolağından çıxmaq asan olmur. Lakin bu vəziyyəti dəyişməliyik”.

Auaşeriya növbəti turda qarşılaşacaqları “Zirə” ilə matçdan da söz açıb: “Çempionatdakı hər oyun çətin keçir. “Zirə” ilə matç da istisna olmayacaq. Ardıcıl çətin qarşılaşmalar keçiririk. “Neftçi” ilə oynadıq, ardınca “Zirə” gəlir. Lakin nəyisə dəyişə bilmərik. Sadəcə meydana çıxıb 3 xal üçün vuruşmalıyıq. İlk dövrədə onları məğlub etmişdik. İnanıram ki, bu dəfə də eyni nəticəni təkrarlaya bilərik”.

“Qəbələ” ilə turnir cədvəlinin yuxarı pillələrində qərarlaşan komandalar arasında xal fərqi getdikcə artır. B.Auaşeriya bu məqamın komandası üçün mənfi hal olduğunu bildirib: “Əlbəttə, bu, çox pisdir. Rəqiblər getdikcə bizdən uzaqlaşırlar. Ona görə də mütləq toplarlanmalıyıq    . Məşqlərdə tam gücümüzlə çalışmalı, həftə sonu da “Zirə” üzərində qələbə qazanmalıyıq”.

O bildirib ki, indiki məqamda bir qələbə çox vacibdir: “Artıq 4 matçdır ki, qələbə qazana bilmirik. Bu, heç də ürəkaçan durum deyil. Arzu edirəm ki, bir qələbə qazanaq. Ondan sonra vəziyyət dəyişəcək. Buna inanıram”.