“Kəpəz”i “Araz-Naxçıvan”la oyuna kim çıxaracaq? - İKİ VARİANT VAR

Azər Məmmədovla yollarını ayıran “Kəpəz”i noyabrın 10-da Azərbaycan Premyer Liqasının XIII turu çərçivəsində “Araz-Naxçıvan”la oyuna kimin çıxaracağı tezliklə məlum olacaq.

Futbolxeber.az saytına bu barədə Gəncə klubunun mətbuat xidmətinin rəhbəri Azad Mustafayev məlumat verib.

O qeyd edib ki, hazırda 2 variant mövcuddur: “Komandanı “Araz-Naxçıvan”la oyuna kimin çıxaracağı günün sonuna kimi müəyyənləşməlidir. Bu, əvəzedici heyətin baş məşqçisi Xaliq Mərdanov da ola bilər, Azər Məmmədovun köməkçilərin biri də. Düzdür, Azər Məmmədovun vəzifəsindən ayrılmasından sonra onun məşqçilər korpusu da “Kəpəz”i tərk edir. Sadəcə ola bilər ki, həmin mütəxəssislərdən biri bir oyunluq komandaya rəhbərlik etsin”.

Bəs “Kəpəz”in yeni baş məşqçisi kim olacaq? Mətbuatda daha çox iki mütəxəssisin - Mahmud Qurbanov və Adil Şükürovun adı hallanır. A.Mustafayev bu barədə sualımıza konkret cavab vermədi. Klub rəsmisi qısaca “hələ ki rəsmi anlaşdığımız məşqçi yoxdur” deməklə kifayətləndi.