Təmkin Xəlilzadə: “Dünya çempionatında xalqımız üçün döyüşürdük”

Dünya çempionatında dördüncü yeri tutan minifutbol millimizin üzvü Təmkin Xəlilzadənin Futbolxeber.az saytına müsahibəsi

- Azərbaycan millisinin dünya çempionatındakı çıxışını necə qiymətləndirirsiz?

- Bu turnirə çox ciddi hazırlaşmışdıq. Bizim üçün vacib yarış idi. Qarşımıza qoyduğumuz ilk məqsəd qrupdan çıxmaq idi. Bu mərhələni maksimum nəticə ilə başa vurduq. Pley-off mərhələsində Portuqaliya və Bolqarıstanı mübarizədən kənarlaşdırdıq. Yarımfinalda Qazaxıstanla üz-üzə gəldik. Bu, finala bərabər oyun idi. Qazaxıstan güclü rəqibdir. Onlar yarımfinala qədər son dünya çempionu Meksika millisini, favoritlərdən olan Çexiya millisini mübarizədən kənarlaşdırmışdılar. İlk hissədə hesabı açsaq da, üstünlüyümüzü qoruya bilmədik.

- Yarımfinaldakı məğlubiyyətdən sonra bürünc medal uğrunda görüşə köklənmək nə dəcərədə çətin oldu?

- Həqiqətən də oyuna hazırlaşmaq çox çətin idi. Düzdür, həmin matçda da əlimizdən gələni etdik. Lakin təəssüf ki, uduzduq. Qol imkanlarından istifadə edə bilmədik.

- Son 2 məğlubiyyətə baxmayaraq, ilk dəfə qatıldığımız dünya çempionatında IV yer heç də pis nəticə deyil.

- Əlbəttə. Dördüncü yer yaxşı nəticədir. Sadəcə yarımfinala kimi irələdikdən sonra daha yüksək nəticə qazanmağı hədəfləyirdik. Təəssüf ki, alınmadı.

- Turnir boyu hər kəs millinin çıxışı ilə maraqlanır, komandaya böyük dəstək verirdi. Bu məqam çıxışınıza müsbət təsir göstərirdi?

- Azərbaycandan bizə çoxsaylı dəstək mesajları gəlirdi. Xalqımız qələbələrimizlə sevinir, bizi izləyirdilər. Onlar oyunumuzdan ləzzət alırdılar. Biz də xalqımız üçün döyüşürdük. Hər birimiz onları çempionluqla sevindirmək istəyirdik. Təəssüf ki, alınmadı.

- Millimiz Qazaxıstanı Avropa çempionatında məğlub etmişdi. Necə düşünürsüz, bu dəfə qələbə üçün nə çatışmadı?

- Bu, futboldur. Konkret səbəb gətirmək bir qədər çətindir. Bugün hər bir komanda digərinə qarşı mübarizə apara bilir. Qazaxıstanla matçda çox yaxşı şansımız var idi. Təəssüf ki, üstünlüyümüzü qoruya bilmədik. Azarkeşlərimizə demək istəyirəm ki, təəssüflənməsinlər. 6 ay sonra Avropa çempionatı başlayır. Həmin turnirə yüksək səviyyədə hazırlaşıb nəticə qazanacağıq.

- Siz özünüz ilk dəfə idi ki, bu cür mötəbər turnirdə ilk dəfə çıxış edirdiz. Dünya çempionatı peşəkar karyeranıza necə bir təcrübə qatdı?

- Xoş hisslər keçirirdim. Hər oyunda qələbə qazandıqca təbrik mesajları alırdıq, insanların, azarkeşlərin rəyləri oxuyurduq. Turnir gözəl xatirələrlə yadda qaldı. Məyusuq. Desək ki, məyus deyilik, yalan olar. Çünki finalın bir addımlığında məğlub olduq. Növbəti gün keçirdiyimiz oyunda medal qazanmaq şansı olsa da, orda da uduzduq. Nə qədər unutmağa çalışsaq da, belə bir turnirdə iştirak yaddan çıxmayacaq. Bu nəticə ilə kifayətlənmək olmaz.

Azad NURİYEV