Şahin Diniyev: “Medallar uğrunda mübarizə aparmırıq”

“İlk növbədə şəhidlərimizin ruhları qarşısında baş əyirik. Bu gün bizim burda rahat oturmağımız onların sayəsindədir. Yaxşı ki, qəhrəman oğullarımız var. Matça gəldikdə, əvvəldən də demişdim ki, bizi çox ciddi sınaq gözləyir. 90 dəqiqə də bunu sübuta yetirdi”.

Futbolxeber.az saytının məlumatına görə, bu sözləri “Səbail”in baş məşqçisi Şahin Diniyev Azərbaycan Premyer Liqasının VII turunda “Araz-Naxçıvan”ı 1:0 hesabı ilə məğlub etdikləri oyundan sonra deyib.

O, komandasının xarakter nümayiş etdirdiyini bildirib: “Hər iki tərəfindən qol şansları var idi. İkinci qolu vursaydıq, işimiz daha rahat olardı. Futbolçularıma təşəkkür edirəm. Xarakter nümayiş etdirdilər. Ağıllı oynayaraq nəticə qazandıq. Eyforiyaya qapılmamalıyıq. Hələ yolun başlanğıcındayıq. Sabah xal da itirə bilərik”.

O, komandasının bir futbolçudan asılı olmadığını vurğulayıb: “Potensialımız var. Bu gün 3 futbolçumuz zədəli oynayırdı. Tam gücləri ilə çıxış etmədilər, Buna baxmayaraq, xarakter nümayiş etdirdilər, Düşünürə ki, bundan da yaxşı oynaya bilərik. Biz komanda yaradırıq. Bir oyunçudan asılı deyilik. Bu, “Səbail”in maksimumu deyil”.

Diniyev hazırda qərarlaşdıqları ikinci pilləni qorumağın çox çətin olduğunu qeyd edib: “Ardıcıl qələbələrə baxmayaraq, komandada eyforiya yoxdu. Buna imkan verməyəcəyik. Yuxarı çıxmaq asandı, orda qalmaq isə çətin. Bundan sonra rəqiblər bizi daha ciddi qəbul edəcək. Əvvəl rəqibi daha çox analiz edirdik, indi isə öz oyunumuzu. Bu futbolçularla nəsə etmək olar. Demirəm medallar uğrunda mübarizə aparırıq. Buna heç vaxt söz verməmişəm. Bacardığımız qədər irəlidə olmağa çalışacağıq”.

Diniyev uğur qazanmaq üçün stabilliyin ciddi önəm daşıdığını bildirib: “Stabil heyət varsa, stabil oyun olacaq, stabil oyun da stabil nəticə deməkdir. İlk növbədə stabilliyi qorumalıyıq”.

Sonda “Səbail”in çalışdırıcısı bu yaxınlarda vəfat edən Şəhriyar Rəhimovu yad edib: “Hər qələbədən sonra Şəhriyarın yanımızda olmaması məni çox məyus edir. Bu komandada onun əziyyəti çoxdu. Bu mövsüm ilk turda “Sumqayıt”a məğlubiyyətdən sonra deyirdi ki, “biz bu qədərmi böyük səhv etmişik”. Mənsə dedim yox, səhv etməmisiz. Təəssüf ki, indi o, bu günləri görmür. Şəhriyarın maykası hər zaman bizim paltardəyişmə otağından asılıdı. Həmişə o, yanımızdadır”.