Cica: “O, Azərbaycanda əfsanə idi”

“Debüt etmək gözəl idi. Komandaya alışmışam, yaxşı uyğunlaşıram. Düşünürdüm ki, oyunçularla münasibətlər qurmaq çətin olacaq, amma hamı məni çox yaxşı qarşıladı”.

Futbolxeber.az saytının məlumatına görə, bu sözləri "Qarabağ"ın albaniyalı yeni transferi Redon Cica ölkəsinin mətbuatına açıqlamasında deyib.

Bakıdakı həyat tərzindən danışan futbolçu bu sarıdan çətinlik çəkmədiyini bildirib: “Yaşadığım evdən klubun bazasına maşınla təxminən 20 dəqiqəlik yoldur. Məşqdən sonra evə qayıdırıq. Bu ilk həftədə düzgün marşrutu tapmaq üçün naviqatordan istifadə etmişəm”.

Cica “Qarabağ”ın sabiq albaniyalı futbolçusu Ansi Aqoli haqda danışarkən Azərbaycanda onun qədər sevilmək istədiyini qeyd edib: “O, burada əfsanə idi. Onu burada tək futbolçu kimi yox, bir insan kimi çox sevirlər. Ümid edirəm ki, bir gün onlar məni Aqolini sevdikləri qədər sevəcəklər”.

“Qarabağ”ın baş məşqçisi Qurban Qurbanovla ilk söhbətindən danışan Cica deyib: "İlk gün mənə dedi ki, sənə inanırıq, Səni izlədik və bacarıqlarını gördük. Sənə tam güvənirəm. "Şamaxı" ilə matçdan sonra debütüm münasibətilə məni təbrik etdi”.

24 yaşlı hücumameyilli yarımmüdafiəçi "Qarabağdakı maaşı haqda danışmaq istəməyib: “Bilirəm ki, biz albanlar maraqlı insanlarıq. Amma bizim bir ifadəmiz var ki, maaşı da, sevgilini də göstərmirik. “Qarabağ”a pula görə yox, daha güclü komandada oynamaq üçün gəlmişəm”.