Maksim Medvedev: “Azarkeş olsaydım, stadiona gələrdim”

"Baxmayaraq ki, son matçda şansımız yoxdur, ancaq yaxşı nəticə qazanmaq, turniri major notda bitirmək istəyirik. Oyunun önəmi böyük olmasa da, ən yaxşısını etməyə çalışacağıq".

Futbolxeber.az saytının məlumatına görə, bu fikirləri "Qarabağ"ın vitse-kapitanı Maksim Medvedev Avropa Liqasının qrup mərhələsinin son turunda Lüksemburqun "Düdelanj"la klubuyla sabah oyunöncəsi mətbuat konfransında deyib.

Təcrübəli müdafiəçi son turdakı ev matçına azarkeş marağının az olmasıyla bağlı sualı belə cavablandırıb: "Bizim işimiz futbol oynamaqdır. Bu, azarkeşlər üçün bir növ şoudur. Biz də istərdik ki, stadion dolsun. Ancaq elə azarkeşlər var ki, köhnə nəticələrimizə baxıb, gəlməyəcəklər. Əsl azarkeşlər yanımızda olmalıdır. Mən özüm azarkeş olsaydım, stadiona gələrdim".

Xatırladaq ki, qrupda yeganə qələbəsini məhz "Düdelanj" üzərində səfərdə 4:1 hesabıyla qazanan "Qarabağ"ın pley-offa çıxa bilməyəcəyi ötən turda rəsmiləşdi (sport24.az).