"Xəzər Lənkəran" Almaniya klubu ilə görüşəcək

Bu gün Almaniya toplanışında “Xəzər Lənkəran” səhər və axşam məşqlərinə çıxmaqla hazırlığın 5-ci gününü tamamladı. Futbolxeber.az-ın məlumatına görə, Con Toşakın rəhbərliyi altında futbolçular hər iki məşqdə əsasən toplu çalışmaları yerinə yetirdilər. Komanda UEFA-nın məlum qərarına əsasən daha erkən Almaniyanı tərk edəcəyindən yoxlama oyunlarında dəyişiklik baş verib. Belə ki, nəzərdə tutulan iki yoxlama oyunundan yalnız biri baş tutacaq. “Xəzər Lənkəran” məskunlaşdığı “Marc Aurel” otelinin futbol meydançasında “İnqolştad” komandası ilə üz-üzə gələcək. Matç keçirilən günün axşamı, iyun ayının 30-na keçən gecə komanda Maltaya yola düşəcək. Sabah isə məşqçilər korpusu gün ərzində bir məşq nəzərdə tutublar. Günorta saatlarında komanda məskunlaşdığı Bad Gogginq qəsəbəsində gəzintiyə çıxacaq.