Yaşar Seyidov: “Jabadan başqa heç kim “Bakı”ya qayıtmayacaq”

Son günlər ölkə mətbuatında Jabanın ardınca Ernad Skuliç, Marius Pena və digər bir neçə sabiq futbolçunun da “Bakı”ya qayıdacağı haqda xəbərlər yayılıb. “Bakı”nın vitse-prezidenti Yaşar Seyidov Futbolxeber.az saytına verdiyi açıqlamada yayılan xəbərlərə aydınlıq gətirib: “Çətin vəziyyətdə olan komandaya dəstək olan sabiq futbolçularımıza minnətdaram. Onların komandaya yardım etmək istəmələri təqdirəlayiq haldır. Bu, sabiq futbolçularımızın etibarından xəbər verir. Lakin yayılan xəbərlər həqiqəti əks etdirmir. “Bakı” Jabadan başqa heç kimi geri qaytarmır. Yalnız Jaba yenidən komandaya qoşulacaq. Mən də mətbuatda bəzi adlar oxudum. Skuliç, Pena və başqalarının qayıdacağı deyilir. Amma yenə də deyirəm ki, bu informasiyalar həqiqətəuyğun deyil. Biz yalnız Jabanın xidmətində maraqlıyıq. O cür xəbərlərin niyə, hansı əsasla ortaya çıxdığını isə bilmirəm”.