"Fənərbaxça"nın 61 illik rekordu təkrarlandı

"Fənərbaxça"nın baş məşqçisi Domeniko Tedesko Türkiyə Superliqasında uğurlu göstəricilərlə diqqət çəkir.

Futbolxeber.az saytının məlumatına görə, almaniyalı mütəxəssis çempionatda ardıcıl 19 oyundur məğlub olmur. Bununla da o, kluba gəlişindən sonra ən uzun məğlubiyyətsiz seriya üzrə 1965-ci ilə aid göstəricini təkrarlayıb.

Superliqanın 22-ci turunda İstanbul təmsilçisi səfərdə "Trabzonspor"u 3:2 hesabı ilə məğlub edib. “Fənərbaxça” Tedeskonun rəhbərliyi altında ilk 19 liqa matçında 13 qələbə qazanıb və 6 heç-heçə edib.

Beləliklə, Tedesko "Fənərbaxça"da 1964-cü ilin oktyabrından 1965-ci ilin fevralına qədər 19 oyunluq məğlubiyyətsiz seriyaya sahib olan Oskar Holdun rekordunu təkrarlayıb.

Hazırda “Fənərbaxça” 22 turdan sonra 52 xalla turnir cədvəlində ikinci pillədə qərarlaşıb. Çempionata isə 55 xalla "Qalatasaray" başçılıq edir.