Rusiyalı hücumçu Trampa səs verməsinin səbəbini açıqladı

“Nyu-York Kosmos”un keçmiş hücumçusu Yevgeni Starikov Rusiya mətbuatına müsahibəsində maraqlı açıqlamaları ilə diqqət çəkib.

Futbolxeber.az saytının Sports.ru-ya istinadən verdiyi məlumata görə, əslən rusiyalı olan, Amerika vətəndaşlığı daşıyan sabiq forvard prezident seçkilərində kimə səs verməsi haqda sual ünvanlayıb:  

“Həm 2016-cı ildə, həm də 2020-ci ildə keçirilən seçkilərdə Donald Trampa səs vermişəm. Yaşadığım Florida Respublikaçıların ştatı hesab olunur. Demokratların yox, məhz onların siyasəti mənə daha yaxındır. Mən ailəmə bağlı insanam, istəmirəm ki, pəncərəmin önündə gey-parad keçirilsin. Yaxud da övladıma məktəbdə ana-ata yox, valideyn-1, valideyn-2 kəlmələrini öyrətsinlər”.

O, ABŞ-da seçkilərin nəticələrinin öncədən məlum olduğunu söyləyib: “Son seçkidə Bayden qalib gəldikdən sonra, araşdırma aparıldı. Sistem də avtomatik olaraq bəzi şəxslərin səslərini Baydenin xeyrinə saydı. Məncə, seçkilərin nəticəsi əvvəldən məlum olur”.

Qeyd edək ki, Yevgeni Starikov 1988-ci ildə Odessada dünyaya gəlsə də, onun valideynləri rusdur. Gələcək hücumçunun 1 yaşı olarkən o, ailəsi ilə birgə Floridaya köçüb. Hazırda Mayamidə yaşayan Starikov ABŞ pasportuna malikdir.