“Napoli”nin prezidenti: “Osimhen satılmır!”

“Napoli”nin prezidenti Aurelio De Laurentis komandanın aparıcı hücumçusu Viktor Osimhenin yayda komandanı tərk edə biləcəyi haqda yayılan xəbərlərə münasibət bildirib.

Futbolxeber.az saytının “Bild”ə istinadən verdiyi məlumata görə, o qeyd edib ki, 24 yaşlı forvard klubu tərk etməyəcək:

“Osimhen satılmır! Bəli, bizim futbolçularımıza böyük maraq var. Lakin mən kimisə satmaq məcburiyyətində deyiləm. Klubun hər hansı bir borcu yoxdur. Maddi baxımdan sıxıntı yaşamırıq. Ona görə də aparıcı futbolçularımızın hamısını heyətdə saxlamağı planlaşdırırıq”.

Daha əvvəl nigeriyalı forvardın “Mançester Yunayted”, “Çelsi” və PSJ-nin maraq dairəsində olduğu deyilirdi.

Qeyd edək ki, Osimhen cari mövsüm bütün turnirlər nəzərə alınmaqla “Napoli”nin heyətində meydana çıxdığı 21 oyunda 17 qol vurub və 3 məhsuldar ötürmə müəllifi olub. İtaliya “A” seriyasında 16 qol vuran afrikalı forvard çempionatın ən yaxşı bombardiridir.