“Mən qol vuranda azarkeşlər “Pu-tin, Pu-tin” qışqırırlar”

Bəhreynin “Əl-Əhli” klubunda çıxış edən Rusiyalı hücumçu Artyom Serdyuk bu ölkədə futbola olan maraqdan danışıb.

Futbolxeber.az saytının Rusiya mətbuatına istinadən verdiyi məlumata görə, 33 yaşlı futbolçu bəhreynli azarkeşlərin futbola böyük maraq göstərmədiklərini qeyd edib:

“Lider komandaların oyunlarına 1000-1500 arası azarkeş gəlir. “Əl-Əhli”nin qarşılaşmaları zamanı stadiona 150-250 arası fanat yığışır. Klubun həndbol, voleybol və basketbol komandaları da var. Hansılar ki, oyunlarını kondisionerli zallarda keçirirlər. Bax, orada anşlaq yaşanır. Lakin fəal futbol fanatları da var. Oyunlar zamanı ərəb dilində mahnılar oxuyurlar. Mən qol vuranda isə “Pu-tin, Pu-tin” qışqırırlar. Rusiya onlar üçün yalnız bir nəfərlə assosiasiya olunur”.

Qeyd edək ki, ötən ildən Bəhreyndə çıxış edən Serdyuk “Əl-Hilal”da forma geydiyi 13 oyunda 5 qol vurub. Bu kluba isə o, Tacikistan təmsilçisi “Xudjand”dan transfer olunub. Təcrübəli hücumçu Bəhreyn çempionatında forma geyən ilk rus futbolçudur.