Aleksandr Səmədov “Neftçi”nin “məharət”indən xəbərsizdi

Rusiya millisinin azərbaycanlı yarımmüdafiəçisi Aleksandr Səmədov Avro-2016-nın seçmə mərhələsində Lixtenşteyni 4:0 hesabı ilə məğlub etdikləri oyun haqda danışıb. Futbolxeber.az-ın məlumatına görə, Səmədov matça ciddi yanaşdıqlarını bildirib: “Asan oyun gözləmirdik. Seçmə mərhələnin ilk oyunu daim mühüm əhəmiyyət kəsb edir. Məşqçilər korpusu bizi əvvəldən xəbərdar etmişdi ki, arxayınlaşmaq olmaz. İlk yarıda xeyli qol epizodu yaratsaq da, cəmi 1 dəfə sevindik. Amma ikinci hissədə fərqli oyun getdi”.

Səmədov Lixtenşteynin 2 avtoqolla yadda qalmasına da toxunub: “Hansısa oyunda komandanın 2 dəfə avtoqol vurmasını xatırlamıram. Həmin epizodlarda biz özümüz rəqib qapısına yol tapmalıydıq. Sadəcə belə alındı ki, Lixtenşteynin futbolçuları özləri topu qapıdan keçirdilər”.

Qeyd edək ki, Səmədov bir komandanın 90 dəqiqə ərzində 2 avtoqolla yadda qaldığı oyunu xatırlamasa da, “Neftçi”nin “Partizan”la səfər oyununda bu “uğur”a imza atdığını azərbaycanlı futbolsevərlər çox yaxşı xatırlayırlar.