Oğuz Çətin: “Fatih Terim heç vaxt mənə dəstək olmadı”

"Xəzər Lənkəran"ın baş məşqçisi Oğuz Çətin Türkiyə millisinin çalışdırıcısı Fatih Terimi tənqid edib. Futbolxeber.az-ın Türkiyə mətbuatına istinadən verdiyi məlumata görə, Çətin yığmada bir müddət birgə işlədiyi Terimin başqa məşqçilərin yolunu kəsdiyini bildirib: “2005-ci ildə Türkiyə millisində işləməyə başladım. O zaman Terim komandadan getdikdən sonra yığmanı mən və ya məşqçi heyətindəki şəxslərdən birinin çalışdıracağını düşünürdük. Ancaq Fatih Terim Türkiyə millisi ilə yolları ayırdıqdan sonra onun əvəzinə Quus Hiddink gətirildi. Hiddinklə də o getdikdən sonra baş məşqçi olacağımı düşündüyüm üçün işlədim. Millinin 80 matçında komandanın məşqçilərindən biri olmuşam. Ancaq bu təcrübəm heç kəs tərəfindən dəyərləndirilmədi. Fatih Terim heç vaxt mənə dəstək olmadı. Mənim yığmada baş məşqçi kimi işləməyimi istəmədi. Ancaq Mustafa Dənizli onun kimi deyil. Fatih Terim, Quus Hiddink, Abdullah Avcıdan sonra niyə Aykut Kocaman, Ertoğrul Sağlam kimi gənc məşqçilər millidə işləməsin? Ölkədə elit məşqçilərin sayını artırmaq lazımdır. Yalnız Fatih Terimi yığmaya gətirmək düzgün deyil. Elit məşqçilərin sayı artsa, ölkə futbolu da inkişaf edəcək".