Ülvü Qənizadə: “Dünya çempionluğu məni arxayınlaşdırmamalıdır”

Xorvatiyanın paytaxtı Zaqreb şəhərində keçirilən dünya çempionatında qızıl və bürünc medal qazanan yunan-Roma güləşçiləri Ülvü Qənizadə və Eldəniz Əzizli öz nəticələri ilə bağlı təəssüratlarını bölüşüblər.

Futbolxeber.az saytının məlumatına görə, 72 kiloqram çəkidə fəxri kürsünün ən yüksək pilləsinə qalxan Ü.Qənizadə mundialın çətin keçdiyini bildirib: “Ən çətin görüşüm final qarşılaşması oldu. Fransa güləşçisi ilə 3-cü dəfə qarşılaşırdım. Çox şükür, bu dəfə də qalib gəldim. Çətin, amma sonu gözəl oldu. Ümid edirəm ki, bundan sonra da belə nəticələrlə xalqımızı sevindirərəm. Bu nəticə məni arxayınlaşdırmamalıdır. Titulu qorumaq və sayını artırmaq lazımdır. Üzərimdə əziyyəti olan hər kəsə – federasiya rəhbərliyinə, məşqçilər heyətinə, həkim və masajçımıza, şəxsi məşqçimə təşəkkür edirəm. Bu çempionluqda onların rolu böyükdür. Ümid edirəm ki, gələcək yarışlarda da onların inamını doğruldacağam”.

Bürünc medalın sahibi Eldəniz Əzizli (55 kiloqram) isə bunları deyib: “Məqsədim beşinci dəfə dünya çempionu olmaq idi. İstəyimə tam nail olmasam da, medalsız qalmadım. Dünya çempionatlarında qazanılan medalların əyarına görə güləşdə ölkə rekordçusu idim. Bu yarışda 7-ci mükafatımı qazanmaqla artıq medal sayına görə də rekorda imza atdım. Buna görə sevinirəm. İldən-ilə gənclərlə rəqabət aparmaq çətinləşir. Ümid edirəm ki, bundan sonra mənim və komandam üçün daha yaxşısı olar”.

Mötəbər yarışda 1 qızıl, 1 gümüş və 2 bürünc medal qazanan yunan-Roma güləşi üzrə Azərbaycan millisi 89 xalla komanda hesabında dünya ikincisi olub. İran (180) birinci, Özbəkistan (72) isə üçüncü yeri tutub.

Xatırladaq ki, yığmanın tərkibində Ülvü Qənizadə (72 kiloqram) qızıl, Həsrət Cəfərov (67 kiloqram) gümüş, Eldəniz Əzizli (55 kiloqram) və Murad Əhmədiyev (97 kiloqram) bürünc medal qazanıblar.