II Avropa Oyunlarının proqramı açıqlandı

2019-cu ildə Belarusun paytaxtı Minskdə keçiriləcək II Avropa Oyunlarının proqramına 16 idman növü salınıb. 

 

Futbolxeber.az-ın məlumatına görə, 2015-ci ildə Bakıda təşkil olunmuş ilk Oyunlarla müqayisədə əsas yer idmanın kraliçası sayılan atletikaya veriləcək. Bu dəfə aşağı divizion ölkələri deyil, yarışda yüksək səviyyəli atletlər çıxış edəcəklər.

 

II Avropa Oyunlarında qılıncoynatma, taekvondo, triatlon və su idman növləri üzrə yarışlar keçirilməyəcək. Beləliklə, Oyunların proqramında atletikadan əlavə, badminton, stritbol (basketbol 3X3), boks, güləş, stolüstü tennis, karate, kamandan oxatma, çimərlik voleybolu, velosiped idmanı, sambo, akademik, kayak və kanoe qayıqlarında avarçəkmə, atıcılıq və gimnastika yer alacaq. Proqrama ağırlıqqaldırmanın da salınacağı planlaşdırılırdı. Lakin son anda bu növ siyahıdan çıxarılıb. Gimnastika, güləş, habelə, olimpiadanın proqramına salınmayan stritbol, sambo və çimərlik futbolu istisna olmaqla, qalan növlər üzrə yarışlar Yay Olimpiya Oyunlarına lisenziya xarakteri daşıyacaq.

 

İdmançılar Tələbə Şəhərciyində yerləşdiriləcəklər. Oyunlar 21 - 30 iyunda keçiriləcək. Açılış və Bağlanış mərasimləri "Dinamo" stadionunda təşkil olunacaq. .

 

Avropa Olimpiya Komitəsi idmançı və rəsmi şəxslərin səfər xərclərini öz üzərinə götürəcək. Təşkilat Komitəsi isə Minskdə qalma xərclərini qarşılayacaq (cbcsport.tv).