“Qəbələ”lilərdən 19 medal

IV İslam Həmrəyliyi Oyunlarına yekun vurulub. Futbolxeber.az-ın məlumatına görə, 11 gün davam edən və mayın 22-də bağlanış mərasimi təşkil olunan yarışda 54 ölkədən 6000 idmançı mübarizə aparıb. 

 

20 idman növü üzrə 268 medal dəstinin sahibini tapdığı yarış Azərbaycan milli komandasının qələbəsi ilə nəticələnib. İdmançılarımız 75 qızıl, 50 gümüş və 37 bürünc medal qazanmaqla ümumi hesabda 1-ci yeri tutub. 162 mükafat qazanan yığmamızın uğurunda “Qəbələ” İdman Klubunun təmsilçilərinin də payı olub. 7 idman növündə yığmamızın heyətində yer alan 18 qəbələli komanda yarışında qazanılan medallar da nəzərə alınsa, 19 mükafata yiyələnib. Bunlardan 8-i qızıl, 9-u gümüş, 2-si bürüncdür. 

 

“Qəbələ”ni İslam Həmrəyliyi Oyunlarında təmsil edən 4 boksçunun hamısı finala qədər irəliləyib. Bu idmançılardan Cavid Çələbiyev (60 kq) qızıl, digər üç boksçu - Tamerlan Abdullayev (69 kq), Kamran Şahsuvarlı (75 kq), Rauf Rəhimov (81 kq) gümüş medala yiyələnib.

Şimal təmsilçisi cüdo yarışlarında da 4 idmançı ilə təmsil olunub. Onlardan ikisi fərdi yarışlarda qüvvəsini sınayıb. Həm Aişə Qurbanlı (48 kq), həm də Kifayət Qasımova (57 kq) qadınların yarışında finala qədər irəliləyərək, həlledici qarşılaşmada uduzduğundan gümüş medala sahib çıxıb. Kifayət həm də yığmanın tərkibində gümüş medal qazanmağa müvəffəq olub. Digər iki cüdoçu - Rüfət İsmayılovla Uşanqi Kokauri yalnız kişilərdən ibarət millinin heyətində tatamı üzərinə çıxıb. Onlar yığmanın heyətində qızıl medala yiyələniblər. Bununla da 4 “Qəbələ” cüdoçusu 5 medal – 2 qızıl və 3 gümüşə sahib olub.

 

Qasımova kimi “Qəbələ”dən olan daha bir qadın idmançı – Nurlana Cəfərova da yarışlarda iki dəfə fəxri kürsüyə qalxıb. Atıcılıqda dəqiqliyini sınayan Cəfərova həm fərdi, həm də qarışıq komanda halında dairəvi stenddə fərqlənib. Nurlana iki dəfə gümüş mükafatçı olmağı bacarıb. Komanda yarışında onunla cütlük təşkil edən Emin Cəfərov da “Qəbələ”nin atıcısı kimi gümüş medalçı olub.

 

Əyalət klubunun taekvondoçuları da yarışdan mükafatsız ayrılmayıb. Bu idman növündə iki “Qəbələ” idmançısı iki medal qazanıb. Milad Beiqi Harçeqani (80 kq) bütün rəqiblərinə qalib gələrək, öz çəki dərəcəsində hamıdan güclü olub. Məhəmməd Məmmədov (63 kq) isə yarımfinalda məğlub olduğundan bürünc medalla kifayətlənib.

 

Karate də iki idmançı ilə təmsil olunan “Qəbələ”yə çempionluq sevincini Rafael Ağayev (75 kq) bəxş edib. Beşqat dünya çempionu İslam Həmrəyliyi Oyunlarında ikisi qızıl olmaqla 3-cü dəfə mükafat əldə edib. Niyazi Əliyev (67 kq) isə bu dəfə mükafatçılar sırasında düşə bilməyib.

 

Uşidakı yeganə “Qəbələ” təmsilçisi Pərviz Abdullayev (75 kq) də hesabına növbəti uğuru yaza bilib. O, turnirin bürünc mükafatçısı olub.

Futbol yarışının qalibi olan 23 yaşadək futbolçulardan ibarət yığmasının uğurunda da “Qəbələ”lilərin payı olub. “Qırmızı-qaralar”ın üç futbolçusu - Rəşad Sadiqov, Tellur Mütəllimov və Elvin Camalov İslam Həmrəyliyi Oyunlarının çempionu adını qazanıb.