Türkiyə millisinin naxçıvanlı üzvü: “Finalda Azərbaycandan revanş alacağıq”

“Bizim üçün oyun uğursuz alındı. Məğlub olduq”.

Futbolxeber.az saytına müsahibəsində bu sözləri Türkiyənin qadınlardan ibarət həndbol yığmasının üzvü Qönçə Naxçıvanlı deyib.

Bakıda keçirilən IV İslam Həmrəyliyi Oyunlarında Türkiyə yığması Azərbaycana 22:27 hesabı ilə uduzub.

Matçdan sonra Naxçıvanlı yenilginin səbəbini millimizin qapıçısının inamlı oyunu ilə izah edib: “Oyuna zəif başladıq. Sona yaxın çalışsaq da, fərqi aradan qaldırmaq mümkün olmadı. Azərbaycanı təbrik edirəm, gözəl oynadılar. Xüsusən də qapıçını qeyd edərdim. Qapıya doğru xeyli sayda zərbə endirsək də, məğlub olduq. Müdafiədə yaxşı, hücumda isə zəif oynadığımızı düşünürəm”.

Təcrübəli həndbolçu finalda yenidən Azərbaycan millisi ilə qarşılaşmaq istədiklərini bildirib: “Yarımfinalda Kamerunla qarşılaşacağıq. Təbii ki, Özbəkistanla görüşməyi üstün tutardıq. Lakin istəyimiz alınmadı. Kamerunu məğlub edəcəyimizi düşünürəm. Azərbaycanla finalda yenidən görüşəcəyik. İkinci görüşdə revanş alacağıq. Çünki belə turnirlərdə 1 komanda ilə ikinci dəfə görüşməməlisən. İkinci dəfə yenidən qələbə qazanmaq çətin olur”.

Türkiyə yığmasının üzvü soyadının Naxçıvanlı olmasına da aydınlıq gətirib:

“İzmirdə doğulsam da, babam naxçıvanlıdır, atamın atası. Naxçıvanda da, Bakıda da qohumlarım var. Bu gün oyuna gəlmişdilər. Bilmirəm daha mənə azarkeşlik edirdilər, yoxsa Azərbaycan yığmasına (gülür). Azərbaycanda daha əvvəl də olmuşam yarışda”.

Söhbətləşdi: FƏRƏC