“Mançester Yunayted”dən ayrılan Falkao, London klubunda forma geymək istəyir

Radamel Falkao “Mançester Yunayted”dən ayrılıb. Futbolxeber.az-ın məlumatına görə, müqavilə ilə “Monako”ya məxsus olan kolumbiyalı forvardın icarə müddəti başa çatıb. Mançester təmsilçisi isə Falkao ilə yeni müqavilə imzalamaqdan imtina edib.

Qeyd edək ki, cari mövsümdə “Mançester Yunayted”in heyətində Premyer Liqada 26 oyuna çıxan 29 yaşlı hücumçu, 4 qol vurub və 5 məhsuldar ötürmə müəllifi olub.

“Mançester Yunayted”in baş məşqçisi Lui van Qal Falkaoya komandadakı xidmətlərinə görə təşəkkür edib.

Digər məlumata görə, Falkao İngiltərəni tərk etmək fikrində deyil. Kolumbiyalı forvard menecerinə bildirib ki, London klubları ilə danışıq aparsın. İngiltərə paytaxtında çıxış etmək üçün Falkao hətta məvacibinin də azaldılmasına razıdır. Onun Mançesterdəki qazancı həftədə 280 min funt-sterlinq idi.