“Birbaşa Bakı”nın baş məşqçisi: “Ardıcıl çempionluqlar qazanmaq istəyirik”

Minifutbol üzrə ölkə çempionu, Çempionlar Liqasının son qalibi “Birbaşa Bakı”nın baş məşqçisi Dan Mitunun Futbolxeber.az saytına müsahibəsi

- Minfutbol üzrə ölkə çepionatının IX turunda çempionluq yolunda əsas rəqibiniz olan “Zirə” üzərində 3:2 hesablı qələbə qazandınız. Görüşü necə şərh edərdiniz?

- Oyundan əvvəl komandaya demişdim ki, bu, pley-off deyil, adi çempionat oyunudur. Vacib olan üç xaldır. Yəni çempionatda “Zirə”ni, yoxsa başqa bir komandanı udaraq bunu qazanmağın fərqi yoxdur. Ola bilər ki, komanda bir az əsəbi idi, bu da çox güclü rəqiblə qarşılaşmağımızdan irəli gəlirdi. “Zirə”yə hörmətlə yanaşırıq. Ola bilər ki, bu səbəbdən hər zaman tələb etdiyimiz və istədiyimiz oyunu sərgiləyə bilmədik. Digər tərəfdən də pis oynadığımızı da deyə bilmərəm. Çünki nəticədə qələbə qazanmışıq. Sadəcə istədiyimiz kimi oynamadıq. Buna baxmayaraq, biz hesabda 3:0 öndə idik. Bu özü də böyük önəm kəsb edir. Son dəqiqələrdə iki asan qol buraxdıq. Bizim səviyyəmizdə olan komandada belə hallar olmamalıdır. Ancaq pley-off mərhələsində belə səhvlərə yol verməkdənsə, indi etmək daha yaxşıdır. Komandamı təbrik edirəm. Oyunu analiz edəcəyik. Bilirəm ki, işləməli olduğumuz məqamlar var.

- Ötən mövsüm 0:3 hesabı ilə uduzduğunuz oyunla müqayisə etsək, sanki “Birbaşa Bakı” daha da güclənib, “Zirə” isə zəifləyib. Razısınız bununla?

- Xeyr, razı deyilim. Çempionatın iki güclü komandası oynayırdı. Əksinə, deyərdim ki, “Zirə” bu matçda bəzi detalları ötənilkindən daha yaxşı etdi. Bəlkə də, onların sadəcə bəxtləri gətirmədi.

- Böyük futbolda hegemonluq “Qarabağ”dadır, minifutbolda isə “Birbaşa Bakı”da. Sizin də hegemonluğunuz uzun illər gedəcək?

- Bura çempionluqlar yaşamağa, Çempionlar Liqasını qazanmağa gəlmişəm. Təbii ki, ardıcıl çempionluqlar qazanmaq istəyirik. Mümkündürsə, bunu edəcəyik. Lakin aydın məsələdir ki, rəqiblərimiz buna mane olmağa çalışacaqlar. Əsas məqsədlərdən biri Çempionlar Liqasını qazanmaq idi. Bunu bacardıq. Növbəti mövsüm titulu qorumağa gedəcəyik. Dayanmaq fikrimiz yoxdur.

- Gələn il Bakıda minifutbol üzrə dünya çempionatı keçiriləcək. Siz milli komandamızın potensialınına bələdsiniz. Çempion olmağımız nə dərəcədə realdır?

- Azərbaycan millisi dünya çempionatına böyük inamla yanaşır. Komandada yaxşı futbolçular var. Lakin təəssüf ki, onların sayı çox deyil. Əgər əsas heyət üzvlərindən 2-3 nəfər zədələnərsə, onları əvəzləmək çox çətin olacaq. Hər şey qaydasında getsə, heç kim zədələnməsə, komandanın fiziki vəziyyəti yaxşı olsa, Azərbaycan millisinin dünya çempionu olmaq üçün kifayət qədər şansı var.

- Dünya çempionatında Azərbaycan millisinin məşqçilər korpusunda yer almağınız mümkündür?

- Əslində, bu haqda danışmaq doğru olmazdı. Çünki Azərbaycan millisinin baş məşqçisi var və o, indiyə qədər çox yaxşı nəticələr qazanıb. Həm də, bu, ümumiyyətlə mümkün deyil. Çünki hər məşqçinin öz oyun fəlsəfəsi, yanaşması var. Azərbaycan millisinə uğurlar arzulayıram. Millinin əsas azarkeşlərindən olacam. Kömək məsələsinə gəlincə, biz onsuz da oyunçu hazırlamaqla milli komandaya kömək edirik.

- Rumıniya millisinin məşqçilər korpusu sizdən Azərbaycan yığmasının son durumu, heyətdəki dəyişiklikləri barədə nəsə soruşa bilər?

- Ola bilər. Lakin onlara məlumat vermək mənim işim deyil. Bu iş üçün Rumıniya millisinin öz məşqçiləri var. Müasir dövrdə internet, yutub vasitəsi ilə məlumatları əldə etmək mümkündür. Digər tərəfdən də onsuz da hamı Azərbaycan millisini əla tanıyır, güclü komanda olduğunu bilirlər.

İbrahim Cəfərov