AFFA öz ampluasında: Millinin 0:13 hesablı məğlubiyyəti gizlədilir

Avqustun 12-də AFFA-nın saytında “U-15 (Qızlar) UEFA İnkişaf Turnirində ilk oyununa çıxıb” başlıqlı xəbər paylaşıldı. Xəbərdə qeyd olunmuşdu ki, 15 yaşadək qızlardan ibarət Azərbaycan milli komandası Qazaxıstanda təşkil olunan UEFA İnkişaf Turnirində ilk oyununa çıxıb. Millimiz meydan sahiblərinin müvafiq yaş qrupundan ibarət komandası ilə qarşılaşıb və rəqibinə 1:2 hesabı ilə uduzub. Xəbərin sonunda isə vurğulanıb ki, U-15 növbəti oyununu avqustun 14-də Rusiya yığmasına qarşı keçirəcək.

Bu gün avqustun 17-sidir, yəni oyundan 3 gün keçib. Lakin AFFA-nın saytında Rusiya yığmasına qarşı keçirilən oyunla bağlı bir cümləyə belə rast gəlinmir. Görəsən, niyə?

Bununla bağlı kiçik araşdırma apardıq və məlum oldu ki, millimiz rəqibinə biabırçı hesabla uduzub. Belə ki, Rusiya yığmamızın qapısından 13 cavabsız qol keçirib.

Birinci hissədən sonra hesab 0:4 olub. Fasilədən sonra meydana çıxan Rusiya yığmasının hücumçusu Nikol Mikaelyan sözün həqiqi mənasında millimizin başına oyun açıb. Belə ki, Moskva “Spartak”ının hücumçusu 47, 59, 74, 76, 84, 87 və 90-cı dəqiqələrdə fərqlənib. Septa-trik edən Mikaelyan həm də Rusiya yığmasının ikinci hissədə vurduğu digər iki qolun da ötürməsini verib.

Futbolda udmaq da olar, uduzmaq da. Sadəcə maraqlıdır, AFFA bu məğlubiyyəti niyə gizlədir? Assosiasiyanın rəsmi saytında Qazaxıstanla oyunun nəticəsi yer alıbsa, Rusiya ilə matçın hesabı niyə gizlədilir? 0:13 olduğuna görə? Belə çıxır ki, millimiz 0:13 yox, 0:3 uduzsaydı, nəticə paylaşılacaqdı? XXI əsrdə, süni intellekt bir yana, internet dövründə bir oyunun nəticəsini gizlətməklə kimi aldadırsınız? Guya AFFA hesabı paylaşmasa, heç kim nəticədən xəbər tutmayacaq?

Görünür, AFFA bu nəticəni paylaşmaqla “Cahangir Fərəcullayev baş katib olandan ölkəmizdə qadın futbolçu inkişaf edir” mifinin dağılmasından narahatdır. Əslində, azarkeşlər də belə olmadığını bilir...

Futbolxeber.az