Ceykob Merfi: “Qarabağ”a qarşı oyunumuz mövsümdəki ən yaxşı matçımız idi”

“Nyukasl”ın hücumçusu Ceykob Merfinin Futbolxeber.az saytına müsahibəsi

- UEFA Çempionlar Liqasının pley-off mərhələsinin ilk oyununda Bakıda “Qarabağ”ı 6:1 hesabı ilə məğlub etdiniz. Görüşlə bağlı nə deyə bilərsiniz?

- Komanda olaraq əla oyun ortaya qoyduq, mükəmməl performans sərgilədik. Artıq ilk hissədə ən yaxşı tərəfimizi nümayiş etdirdik. Bu, bizim mövsüm ərzində oynadığımız ən yaxşı matç idi. Üzərimizdə təzyiq böyük idi. Lakin komanda yoldaşlarımın, xüsusilə Entoni Qordonun etdikləri inanılmaz idi. O, bacardığı hər şeyi etdi. Hər kəs bu gün maksimum üçün çalışdı. Rahat və özünə əmin şəkildə qələbə qazandıq.

- Düşünürsünüz ki, "Nyukasl" artıq növbəti mərhələyə vəsiqə qazanıb?

- Xeyr, belə deməzdim. Qarşıda bizi cavab matçı, böyük 90 dəqiqə gözləyir. Biz heç bir rəqibə yuxarıdan aşağı baxmırıq. Biz bu matça qədər "Qarabağ"ın oyunlarını izləmişdik. Onları yaxşı təhlil etmişdik. Bilirdik ki, "Qarabağ" "Çelsi"yə qarşı baxımlı oyun sərgiləmişdi, sərfəli nəticə qazanmışdı. Ona görə də illuziyaya qapılmadıq. Rəqibimiz olduqca kəskin, hiyləgər komandadır. Bu səbəbdən təcrübəmizi nümayiş etdirməli, qollar vurmağa davam etməliyik. Burada qazandığımız hesab yaxşı oyunun göstəricisidir.

- Ümumilikdə, "Qarabağ"ı rəqibi kimi necə xarakterizə edərdiniz? Stadiondakı atmosferi necə dəyərləndirirsiniz?

- Stadionda atmosfer çox yaxşı idi. Bizim azarkeşlərin də iştirakı, 90 dəqiqə ərzində bizi dəstəkləmələri matça xüsusi rəng qatdı. "Qarabağ"a gəldikdə deyə bilərəm ki, olduqca güclü rəqiblərdir. Prinsipial, nə istədiklərini bilən bir kollektivdir. Düzgün yoldadırlar, daim öz üzərində çalışıb inkişaf edirlər. Baxımlı futbol sərgiləyən rəqibə qarşı oynadıq.

Azad Nuriyev