Enrika Silva: “Komanda xal itirirsə, günah baş məşqçidə yox, biz futbolçulardadır”

“Çox çətin oyun keçdi. Meydanın da durumu ağır idi. “Şamaxı” yaxşı komandadır. Təəssüf ki, qol vurmaq üçün kifayət qədər epizodlar yaratmadıq”.

Futbolxeber.az saytına müsahibəsində bu sözləri “Turan Tovuz”un müdafiəçisi Enrike Silva Azərbaycan Premyer Liqasının 20-ci turunda “Şamaxı”ya qarşı keçirilən matç (0:0) barədə danışarkən deyib.

Braziliyalı müdafiəçi Şamaxı səfərində xal itirməklə üçüncü pilləyə yüksəlmək şansını əldən vermələrinə belə münasibət bildirib: “Təbii ki, buna görə təəssüflənirik. Lakin ehtiyatda bir oyunumuz var. Üstəlik, qarşıda bizi 13 tur gözləyir. İnanıram ki, bu mübarizədən biz qalib çıxacağıq”.

O, növbəti turda “Zirə”yə qarşı keçirəcəkləri matçdan da söz açıb: “Həmin görüşə çox ciddi hazırlaşırıq. Bizi çox maraqlı və gərgin oyun gözləyir. Rəqib güclü olsa da, məqsədimiz qələbə qazanmaqdır”.

E.Silva “Turan Tovuz”un baxımlı futbol sərgiləməməsi fikrinə belə münasibət bildirib: “Əlbəttə, çatışmazlıqlarımız var və bunun üzərində işləyirik. Lakin unutmayaq ki, futbolda əsas olan nəticədir. Gözəl oynayıb uduza da bilərsən. Vacib olan lazımi nəticə qazanmaqdır”.

32 yaşlı futbolçu “Turan Tovuz”un baş məşqçisi Kurban Berdıyevə qarşı yönələn tənqidləri haqsız sayır: “Biz hamımız birlikdəyik, vahid kollektivik. Komanda xal itirirsə, günah baş məşqçidə yox, biz futbolçulardadır. Deməli, verilən tapşırıqları düzgün icra etməmişik. Kurban Berdıyev çox təcrübəli mütəxəssisdir. Məşqlərdə də çox çalışır. Bu ana qədər qazandığımız nəticələr heç də pis deyil. İnanıram ki, mövsümün sonunda qarşıya qoyulan hədəfə çatacağıq”.