Andrade: “Qarabağ”ın “Ayaks”ı udması, yaxud uduzması bizim üçün əhəmiyyətsizdir”

“Araz-Naxçıvan”ın yarımmüdafiəçisi Patrik Andradenin Futbolxeber.az saytına müsahibəsi

- Azərbaycan Premyer Liqasının14-cü turunda “Kəpəz”i məğlub etməklə uğursuz gedişata son qoydunuz. 2:0 hesablı qələbəni necə şərh edərdiniz?

- Çətin oyun oldu. 3-4 gün əvvəl də kubokda “Kəpəz”lə qarşılaşmışdıq. Həmin görüşdə nəticə istədiyimiz kimi alınmamışdı. Məşqçilər korpusu oyunumuzu analiz elədi. Səhvlərimiz üzərində çalışdıq və bunun bəhrəsini gördük. Qələbə qazandığımız üçün sevinirəm.

- Kubokdakı məğlubiyyəti nəzərə alsaq, “Kəpəz”lə çempionat matçına revanş görüşü kimi yanaşdığınızı söyləmək olar?

- Bəli, belə demək olar. Məqsədimiz ötən oyundakı səhvləri təkrarlamamaq və qələbə qazanmaq idi. İstəyimizə çatdığımız üçün sevinirəm.

- Komanda son zamanlar qeyri-stabil çıxış edir. “Araz-Naxçıvan” nə üçün özünə bənzəmir?

- Bu, futboldur. Biz bütün oyunlarda qalib gələ bilmərik. Mövsüm boyu eyni tempdə çıxış etmək də mümkün deyil. Bu, tək bizə yox, bütün komandalara aiddir. Ümumilikdə razıyam, pis situasiyaya düşmüşdük.

- Bu qələbə vəziyyəti dəyişəcək?

- İnanıram ki, bu qələbə ilə vəziyyət yaxşıya doğru dəyişəcək. Bizim üçün vacib oyun idi, vacib qələbə idi.

- Vurduğunuz qolla bağlı nə deyə bilərsiniz? Hamı ötürmə edəcəyinizi düşündüyü anda əla zərbə ilə fərqləndiniz...

- Bəli, ötürmə vermək də olardı. Lakin ağlıma ilk gələn zərbə endirmək oldu. Düşündüm ki, ötürmədənsə, qol vurum.

- Adətən qol vurduqdan sonra sevincinizi başınız üzərindən tullanaraq qeyd edirsiniz. Amma bu dəfə həmin sevinci görmədik. Maraqlıdır, niyə?

- Olduğum yer bir qədər dar idi (gülür). Urfan Abbasov da çox yaxında dayanmışdı.

- Növbəti turda sabiq komandanız “Qarabağ”la qarşılaşacaqsınız. Həmin matçdan gözləntiləriniz nədir?

- Bəli, bazar günü “Qarabağ”la qarşılaşacağıq. Rəqibi analiz edəcəyik. Məşqlərdə tam gücümüzlə çalışacağıq. İlk dövrədə onlara qarşı oyunumuz uğursuz alınmışdı. İnanıram ki, bu dəfə vəziyyət fərqli olacaq. Ümumilikdə bizi maraqlı görüşün gözlədiyini deyə bilərəm.

- “Qarabağ” bu gün Çempionlar Liqasında “Ayaks”la üz-üzə gələcək. Sizcə, çempionatdakı oyununuz baxımından Ağdam klubunun qələbəsi sizə daha sərfəli olar, yoxsa məğlubiyyəti?

- O barədə düşünmürük. Bizim üçün öz oyunumuz vacibdir. “Qarabağ” qalib gəlsə, Azərbaycan üçün bu, yaxşıdır. Sırf bizə görə “Qarabağ”ın “Ayaks”ı udması, yaxud uduzmasını əhəmiyyətsizdir.

- Qış fasiləsinə iki tur qalıb. “Araz-Naxçıvan”ın qarşıya qoyulan hədəfə - avrokuboklara yollanmaq perspektivini necə görürsünüz?

- Yol uzundur. İndidən mövsümün sonu ilə bağlı qəti proqnoz vermək çətindir. Məqsədimizə doğru addım-addım irəliləməliyik.