Brahim Konate: “Zirə”nin qarşıya qoyulan məqsədə çatması elə də çətin görünmür”

“Zirə”nin yarımmüdafiəçisi Brahim Konatenin Futbolxeber.az saytına müsahibəsi

- Azərbaycan Premyer Liqasının XI turunda “Turan Tovuz”la qolsuz bərabərə qaldınız. Görüşü necə şərh edərdiniz?

- “Turan Tovuz” çox güclü rəqibdir. Yaxşı müdafiə olunurlar. Onlara çox qol vurmaq demək olar ki, mümkün deyil. 90 dəqiqə ərzində döyüşdük, meydanda tam gücümüzlə mübarizə apardıq. Yekunda heç-heçə qeydə alındı. Məncə, bu matçda 2 xal itirmədik, 1 xal qazandıq.

- Lakin nəzərə almaq lazımdır ki, 60-cı dəqiqədən etibarən say üstünlüyünə malik idiniz...

- Bəli, rəqib azlıqda qaldıqdan sonra hesabı açmağımız mümkün idi. Lakin “Turan Tovuz” 10 nəfərlə əsas gücü müdafiəyə yönəltdi. Demək olar ki, bütün komanda ilə arxaya çəkilmişdilər. Bu halda onların müdafiə xəttini yarmaq çox çətin idi. Yenə də fikrimdə qalıram ki, biz 2 xal itirmədik, 1 xal qazandıq. Bu matçda qalib gələ bilməsək də, növbəti matçlarda istəyimizə çatmağa çalışacağıq.

- Oyundakı ən mübahisəli epizodun baş rol ifaçısı kimi, həmin anı necə dəyərləndirirsiniz? Hakimin sizə qırmızı vərəqə göstərib, sonra qərarını ləğv etməsi barədə fikirləriniz necədir?

- Mənə görə, qırmızı vərəqəlik epizod deyildi. Fikir verdinizsə, hakim mənə qırmızı vərəqə göstərsə də, meydanda qaldım, paltardəyişmə otağına yollanmadım. Referinin VAR-a baxmasını gözləyirdim. Çünki qırmızı vərəqəyə layiq olmadığıma əmin idim. Həmin epizodda Miller mənə yaxınlaşdı, mən ona demək olar ki, toxunmadım. O isə anidən özünü yerə atdı.

- Çempionatın ilk dövrəsi başa çatdı. Geridə qalan müddəti “Zirə” üçün necə dəyərləndirirsiniz?

- Ümumilikdə komandanın performansı barədə xoş sözlər demək olar. Bəzi matçlarda heç-heçə ilə kifayətləndik. Halbuki həmin görüşlərdə də qələbə qazanmaq mümkün idi. Yalnız 1 matçda məğlub olduq. Komanda ilk dövrədə heç də pis təsir bağışlamadı. İndi əsas olan ikinci dövrəyə yaxşı hazırlaşmaqdır.

- Gedişat nə göstərir, “Zirə” qarşıya qoyulan hədəfə çata biləcək?

- Son 3-4 ildə “Zirə” hər dəfə avrokuboklara vəsiqə qazanır. Odur ki, mövsümü yüksək mövqelərdə bitirməyimiz məqsədə çevrilib. Məqsədə çatmağımız isə elə də çətin görünmür. Yenə də yüksək yerlər uğrunda mübarizə apara bilərik. Ümumilikdə biz iddialı komandayıq.

- Fərqli klubda olsanız da, ötən il də Azərbaycanda çıxış etmisiniz. Legioner limitinin ləğvindən sonra çempionatın səviyyəsində fərq hiss olunur?

- Bəli, limitin ləğvindən sonra çempionatın səviyyəsi daha da artıb. Bütün rəqiblər yüksək pillər uğrunda mübarizə aparmağa cəhd edirlər. Bu, bizim işimizi çətinləşdirsə də, futbolun səviyyəsinin artmasına kömək edir.

- Qarşıdan DÇ-2026-nın seçmə mərhələsində Azərbaycan - Fransa oyunu gəlir. Həmyerlilərinizin millimizlə matçından gözləntiləriniz nədir?

- Maraqlı oyun olacaq. Parisdəki matçda uduzsa da, Azərbaycan millisi yaxşı görünürdü. Həmin görüşü izləmişdim. Təbii ki, Fransa millisi daha güclüdür. Lakin futbolda hər şey mümkündür. İlk matçda da bunu gördük. Fransa yığması yalnız hissənin sonunda Mbappenin qolu ilə hesabı açmışdı.

İbrahim Cəfərov