Rəşad Sadıqov: “Rəqibə qol epizodu vermədik”

"İlk növbədə xalqımızı və dövlətimizi Zəfər Günü münasibətilə təbrik edirəm. Allah şəhidlərimizə rəhmət eləsin, qazilərimizə can sağlığı versin. Zəfərimiz daim olsun. Bu gün əzmkar oyunun olacağı əvvəlcədən bəlli idi. Qarşımızda hücum potensialı yüksək olan, əks-hücumlarda və cinahlardan qurduğu hücumlarla təhlükə yarada bilən rəqib vardı. Bütün bunları nəzərə alaraq hazırlaşmışdıq. Futbolçularım böyük əzmkarlıq göstərdi və demək olar, rəqibə real qol imkanı vermədik. Komandamız diqqətli oynadı, hücumların qarşısını peşəkarlıqla aldı. 60-cı dəqiqədən sonra say üstünlüyü qazandıq. Bu vaxta qədər oyun bərabər mübarizə şəraitində keçirdi. Tam yüzfaizlik olmasa da, qol şanslarımız oldu və daha çox qüvvə ilə hücuma atıldıq. Sadəcə rəqibin qapıçısı və müdafiə xətti etibarlı oynadı. Nəticə istədiyimiz kimi olmasaydı belə, futbolçularımın davranışından və mübarizəsindən razı idim. Bu yolla davam etməliyik. Milli fasilədən sonra daha da yaxşı hazırlaşıb, arzuladığımız nəticəni qazanmağa çalışacağıq".

Futbolxeber.az saytının məlumatına görə, bu sözləri Azərbaycan Premyer Liqasının 11-ci turunun "Zirə" - "Turan Tovuz" (0:0) görüşündən sonra keçirilmiş mətbuat konfransında ev sahibi komandanın baş məşqçisi Rəşad Sadıqov bildirib.

O, jurnalistlərin suallarını cavablandırıb.

- Hakimliyi bəyəndiniz?

- Birinci hissədə epizodlar var idi ki, etiramızı bildirdik. Bizi özümüzdən çıxaran epizod var idi. Uzaq tərəfdə olan yan xətt hakimi qırmızı vərəqə verilməsini tələb etdi və epizoda 50 metrdən müdaxilə etdi. VAR sistemi var. Epizodda "qırmızı"lıq bir şey yox idi. Əliyar bəyin də dərhal qırmızı verməsi, hamımız emosional olduq. Oyunun sonunda foullar var idi ki, bəlkə bizim, digər komandaların xeyrinə verilsə, təhlükəli deyil. Amma "Turan Tovuz" standart vəziyyətlərdə təhlükəlidir. Oyunun içində bu məqamlar olur. Hakim səhvi nəticəyə təsir etmədi. Vacib olan budur.

- Tiaqo Silva start heyətinə qayıtdı. Bunun xüsusi səbəbi var idi?

- Plan iki oyunluq idi. Aydın Bayramova şərait yaratdıq ki, oyun praktikasını yaxşılaşdırsın. Milli komandada start heyətində meydana çıxmaq üçün qapıçılarda rəqabət var. Milli və Aydın bizim üçün dəyərlidir. Bizdə 1-ci və 2-ci qapıçı arasında uçurum yodur. Tiaqoya da əvvəldən demişdik ki, belə olacaq. Öncədən də məlum idi ki, bu gün qapıda Tiaqo olacaq.

- Bu gün oyunun rəsmi start zərbəsini Tamerlan Burcəliyev vurdu. O, futbolçu karyerasını erkən bitirib və hazırda məşqçi kimi fəaliyyət göstərir. Bu qərarı verməsinin səbəbi nədir?

- Məşqçiliyi seçməsi öz qərarıdır. Müdrik qərar verdi. Erkən başlaması məşqçilik karyerası üçün də yaxşıdır.

- Əvvəlki mövsümlərdə "Zirə"də qələbəsizlik seriyası yaranırdı. Nələri dəyişdiniz ki, indi bu cür seriya yoxdur?

- Çempionatın ortasında belə ssenarilər oldu. Amma heç kim zəmanət verməyib ki, indi olmayıbsa, gələcəkdə də olmayacaq. Daha çox özümü təhlil edirdim ki, niyə elə perioda düşürdük. Bu il daha çox motivasiya olduq, daha çox öz işimizin üzərində çalışdıq ki, futbolçulara yanlış enerji getməsin. Futbolçular başa düşür ki, builki çempionat əvvəlki kimi deyil. Futbolumuz inkişaf edir. Bu da bizi sevindirir. Amma nəticə qazanmaq da çətinləşir. Futbolçular da bunu düzgün təhlil edirlər ki, 7-ci pillə ilə 2-ci pillə arasında proqnoz vermək olmur. Çempionluğa da aiddir. Hiss edirəm ki, bu mübarizə sona qədər belə gedəcək.