“Gəncənin futbol əfsanələri” şurası yaradılıb

“Kəpəz” Peşəkar Futbol Klubunun nəzdində yeni şura – “Gəncənin futbol əfsanələri” təsis edilib. Bununla əlaqədar klubun iclas keçirilib.

Futbolxeber.az saytının məlumatına görə, bu haqda klub açıqlama yayıb.

Tədbirdə “Kəpəz” PFK-nın infrastruktur rəhbəri Ruslan Məmmədov, seleksiya üzrə məşqçi Əli Rəhimov, komandanın baş məşqçisi Azər Bağırov, köməkçi məşqçi Zaur Əsədov, eləcə də Gəncə futbolunda dərin iz qoymuş sabiq futbolçular iştirak ediblər.

Ruslan Məmmədov şuranın yaradılma məqsədi barədə məlumat verib. O, bildirib ki, şuranın əsas məqsədi Gəncə futbolunun tarixi irsini qorumaq, təcrübəli futbolçularla gənc nəsil arasında əlaqəni gücləndirməkdir.

Tədbirdə Əli Rəhimov şuranın sədri seçilib.

Tədbirin sonunda keçmiş futbolçular öz fikirlərini səsləndirib, təklif və iradlarını bölüşüblər.