Tahir Gözel: “Bir milyonluq oyunçuya dəyərindən artıq pul ödəsək...”

"İngiltərənin "Çelsi" və "Liverpul" kimi komandalarına qarşı oynayacağıq. Portuqaliya klubları ilə oynamaq mənə ləzzət verir. “Napoli” də İtaliya üçün əzilmiş xalqın savaş simvoludur. Belə bir klubun "Qarabağ"la oynaması çox böyük bayramdır. Xaricdə bunu biləndə məni qucaqlayırlar. Artıq bizi sevir, qəbul edir, sevinirlər".

Futbolxeber.az saytının məlumatına görə, bu sözləri “Qarabağ”ın prezidenti Tahir Gözel jurnalistlərə açıqlamasında deyib.

O, UEFA Çempionlar Liqasının əsas mərhələsi üçün yeni hücumçu transfer edilməməsinin səbəbini də açıqlayıb. Klub prezidenti qeyd edib ki, bu, maliyyə ilə bağlıdır:

“Bir milyonluq oyunçuya dəyərindən artıq pul ödəsək, klub bir neçə ilə müflis olar. Qurban Qurbanov həmin oyunçulara heç vaxt dəyərindən artıq pul ödənilməsinə razı olmur. Hətta heyətdəki futbolçulara bu dəqiqə on beş milyon təklif gəlsə, onu buraxmarıq. Qurban hoca onun əvəzinə ayrı-ayrı mövqelərə üç nəfər fərqli oyunçu gətirməyi daha məqsədəuyğun hesab edir. Mən Musama, Nərimanıma inanıram. Toral Bayramovun ötən il “Budo-Qlimt”ə vurduğu qol məni valeh etdi. Ötən dəfə Musa Qurbanlının “Ferentsvaroş”a meydana girən kimi vurduğu qol mənə ləzzət etdi. İnanıram ki, bu mövsüm belə qollar yenə görəcəyik”.