“Mingəçevir”in yüksəlişi və ya Füzuli Məmmədov imzası

Dünən I Liqada 24-cü tura start verilib. Səfərdə “Difai”nin qonağı olan “Mingəçevir” rəqibini 4:1 hesabı ilə darmadağın edib. Bu qələbə sayəsində Füzuli Məmmədovun komandası turnir cədvəlində dördüncü pilləyə yüksəlib.

İndidən komandanın mövsümü hansı pillədə bitirəcəyini söyləmək çətindir. Lakin istənilən halda “Mingəçevir”in yüksəlişi göz önündədir. Bunda isə baş məşqçi Füzuli Məmmədovun rolu danılmazdır.

Bu, həmin “Mingəçevir”dir ki, 12 turdan sonra aktivində cəmi 6 xalı var idi və sonuncu pillədə qərarlaşmışdı.

Bu, həmin “Mingəçevir”dir ki, 14 tur qələbəyə həsrət qalmışdı.

Bu, həmin “Mingəçevir”dir ki, bəziləri artıq komandanın I Liqa ilə vidalaşacağını, yeni mövsümə II Liqada başlayacağını iddia edirdilər.

Lakin göründüyü kimi, hazırda komanda nəinki sonuncudur, hətta dördüncü pilləyə yüksəlib. Yəqin ki, indi “Mingəçevir” azarkeşləri təəssüflənirlər ki, kaş Füzuli Məmmədov komandaya mövsümün əvvəlindən rəhbərlik edərdi. Bəlkə o halda komanda artıq Premyer Liqaya vəsiqə qazanmışdı da...

Füzuli Məmmədov həm də son vaxtlarda mətbuatda ən çox müzakirə olunan məşqçilərdəndir. PRO kateqoriyalı mütəxəssis haqqında o qədər yazırlar ki... xüsusən də neqativ. Lakin Məmmədov bütün bu yazılanlara öz işi ilə cavab verir. Bu da nəticəsi! Məşqçinin yerinə hər zaman nəticələri danışır. Nəticə isə göz önündədir. Uzun müddət qələbəyə həsrət qalan, xeyli müddət sonuncu pillədə məskunlaşan “Mingəçevir” bu gün artıq dördüncüdür.

Əslində, klub rəhbərliyi təcrübəli mütəxəssislə uzunmüddətli müqavilə imzalayarkən ona inamını nümayiş etdirmişdi. Heç kimə sirr deyil ki, “Mingəçevir”in böyük hədəfləri var. Artıq Füzuli Məmmədov qarşıya qoyulan ilk məqsədə çatıb. Komanda I Liqadakı yerini qorudu. Odur ki, Məmmədovun rəhbərliyi altında növbəti mövsüm daha güclü “Mingəçevir” görəcəyimiz şübhə doğurmur.

Futbolxeber.az