Ayxan Abbasov: "Çempionatın sonuna kimi mübarizə gedəcək"

"Şamaxı"nın baş məşqçisi Ayxan Abbasov Azərbaycan Premyer Liqasının 21-ci turunda "Neftçi"yə 0:1 hesabı ilə məğlub olduqları oyundan danışıb.

Futbolxeber.az saytının məlumatına görə, o, oyundan sonra keçirilən mətbuat konfransında deyib:

"Oyuna yaxşı başladıq. Yüz faizlik qol epizodlarını istifadə edə bilmədik. Amma təəssüf ki, 46-cı dəqiqədə qapımızda penalti zərbəsi gördük. Oyunun taleyi onunla da həll olundu. Dəyişikliklər etdik. Oyuna müdaxilələr etmək istədik. Amma, təəssüf, alınmadı. Bu oyunu unudub, növbəti oyunlara hazırlaşacağıq. Həqiqətən, çempionat kritikdir. Komandamıza, futbolçularıma inanıram. İnşallah, bu durumdan birlikdə çıxacağıq".

Mütəxəssis turnir cədvəlində "Şamaxı"nın 9-cu yerə enməsini şərh edib: "Ümumən, bilirdik ki, digər komandalarla böyük bir xal fərqimiz yox idi və bir qələbə yerləri dəyişə bilər. Qarşıda oyunlar var. Həmişə demişəm ki, çempionatın sonuna kimi mübarizə gedəcək. Bunu gözləyirdik. Ola bilər üstünlüyümüz var idi, bunu itirdik. Amma bundan sonra da heç nə itməyib. İnşallah, çalışacağıq ki, futbolçuları bu gərginlikdən sonra oyunlara daha yaxşı kökləyək".

A.Abbasov "Cəlal Hüseynovun oyunu ilə bağlı nə deyə bilərsiniz?" sualına belə cavab verib: "Bu gün təkcə hansısa oyunçumuz haqda danışmaq düz olmaz. Bilirik ki, Cəlal bizə yeni qoşulub. İki oyun əsas heyətdə meydana çıxmışdı, bu gün ehtiyatdan daxil oldu. Oyuna girmək də çətinlikdir. Biraz texniki səhvləri çox edir. Əlbəttə, gəncdir, daha çox çalışmalıdır. Biz də bunun üzərində çalışırıq. Bu gün görürdük ki, təkcə Cəlal yox, bir çox gənc oyunçular sonluqda səhvlər edirdilər. Hansı ki, o qərarlar düz olsaydılar, oyunun nəticəsinə təsir edəcəkdilər. Gənclərə şans veririksə, bu tərəfi də düşünüb səbirli olmaq lazımdır. Çalışmalıdı".