Çempionlar Liqasının qalibi “Neftçi”də inzibatçı işləyir

“Araz-Naxçıvan” - “Neftçi” oyunundan sonra həmkarlarla birgə miks-zonada futbolçuların yolunu gözləyirdik. Düzdür, həmişəki kimi uduzduqları üçün “Neftçi”nin futbolçuları mətbuatdan yan gəzirdilər. Heç kapitan Emil Balayev də danışmaq istəmədi. Digər oyunçuların da hərəsi stadionun bir qapısından aradan çıxdı. Amma sözümün canı bu deyil.

Miks-zonada olarkən gözüm bir nəfərə satışdı. Öz-özümə “əşşi, o ola bilməz” dedim. Milli üzvü, Çempionlar Liqasının qalibi hara, administrator hara. Sonradan isə məlum oldu ki, zənnimdə yanılmamışam. Bu odur...

Əvvəla onu deyim ki, qətiyyən hansısa peşə sahibini aşağılamaq fikrindən uzağam. Elə bir şey mümkün deyil! Necə deyərlər, kişi halal yolla çörək qazanar. Lap daş da daşıyar. Cavan vaxtı əksərimiz xərclərimizi qarşılamaq üçün ofisiant da işləmişik, yük də daşımışıq. Yəni uzun sözün qısası, administator işləmək qətiyyən ayıb bir şey deyil. Sadəcə mənim qəbul edə bilmədiyim milli üzvü, Çempionlar Liqasının qalibi olan Eşqin Tağıyevin administrator kimi çalışmasıdır. Səbəbini bilmirəm. Amma görünən odur ki, minifutbolda aldığı maaş normal yaşamaq üçün bəs etmir. Əks halda Çempionlar Liqasının qalibi, milli üzvü nəyə görə gəlib “Neftçi”də administrator işləməlidir...

Mənə görə bu, həm də ədalətsizlikdir. Son illər minifutbol üzrə ölkə çempionatını, millinin qatıldığı turnirləri mütəmadi izləyən biri kimi deyirəm - Eşqin Tağıyev bu gün Azərbaycanda ən güclü 3 minifutbolçudan biridir. İstər “Birbaşa”nın, istərsə də millinin qazandığı uğurlarda böyük pay sahibidir. Mənə görə, o, bu gün “Neftçi”nin heyətində böyük məbləğdə məvacib alan, lakin bunun qarşılığını meydanda verməyən əksər futbolçulardan daha istedadlıdı, daha güclüdür! Meydana çıxsa, onların əksərindən daha yaxşı oynayar. Və indi həmin Eşqin Tağıyev gəlib “Neftçi”nin adına, səviyyəsinə uyğun gəlməyən futbolçuların çantada iylənmiş maykasını, şortikini daşıyır. Bu yerdə deyiblər e, ədalətin budur dünya?..

İBRAHİM