Kölgədən qorxanlar

Elxan Məmmədov artıq bir neçə ildir AFFA-da deyil, FİFA-da fəaliyyət göstərsə də, onu istəməyən qüvvələr kölgəsindən də çəkinirlər. Bu, subyektiv, yaxud pafoslu fikir deyil, reallıqdır. Xatırlayırsınızsa, bir müddət əvvəl Elxan Məmmədov Bakıya gəlib “Araz-Naxçıvan”ın oyununda Zaur Axundovla birgə “CBC Sport” ekranlarında görünmüşdü. Həmin vaxt Məmmədovla Axundovun birgə görüntüsü bəzi AFFA rəsmilərində əməlli-başlı təşviş yaratmışdı. Bu zaman onların dilindən səslənən “oyuna gələndə onu efirdə göstərirsiniz, məni isə yox” fikri Elxan Məmmədovun kölgəsindən də çəkinmək deyilsə, bəs nədir?..

Son 2 gündə Məmmədovun yer aldığı 2 foto yenə də gündəm olub. FİFA prezidenti Canni İnfantino Bakıda keçirilən COP29-da iştirak etmək üçün paytaxtımıza gəlib. Səfər zamanı İnfantinonu FİFA-da Üzv Assosiasiyaların direktoru vəzifəsini tutan Elxan Məmmədov müşayiət edib. Bu məqam sensasiya kimi təqdim edilməyə çalışılsa da, əslində, qeyri-adi heç nə baş verməyib. Birincisi ona görə ki, Elxan Məmmədov Canni İnfantinonu ilk dəfə deyil ki, Avropa ölkələrinə səfəri zamanı müşayiət edir. Bu hal daha əvvəl də olub. İkincisi, FİFA-da rəhbər vəzifələrdən birini tutan Məmmədovun vətənində keçirilən tədbirə FİFA prezidenti ilə birgə qatılmasında qeyri-adi nə var ki? Bu ilin aprelində AFFA-nın Hesabat-Seçki Konfransında da FİFA-nı məhz Elxan Məmmədov təmsil etmişdi. O halda “Elxan Məmmədov Azərbaycan futboluna qayıtmaq istəyir” fikrinin ortaya atılmasına, bu qədər ajiotaj yaradılmasına nə lüzum var? Xatırlayırsınızsa, aprelə qədər AFFA prezidentliyinə seçkilər ərəfəsində də oxşar hallar yaşanırdı. Halbuki normal düşünsək, bu gün Elxan Məmmədov FİFA kimi mötəbər qurumda rəhbər vəzifə tutur. Onun hazırkı mövqeyi statusca AFFA-nın baş katibi postundan da, lap elə AFFA prezidentliyindən də yüksəkdir. Bu halda adam niyə karyera baxımından geri addım atmağa çalışsın ki? Bir şey ki, bu gün AFFA belə qurum olaraq FİFA-da Üzv Assosiasiyaların direktoruna, yəni Elxan Məmmədova tabedir. Heç kim inciməsin, amma elə son iki gündə yaradılan ajiotaj da bəzilərinin Elxan Məmmədovun kölgəsindən də çəkinməsinin növbəti sübutudur...

P.S. Elxan Məmmədovun vəzifəcə yerini tutmaq olar, amma İnfantinonun gəlişi ilə bağlı xəbərin təqdimatı göstərdi ki, onun statusunda olmaq asan deyil: “Heydər Əliyev Beynəlxalq Aeroportunda FİFA prezidentini SOCAR-ın vitse-prezidenti Elşad Nəsirov və digər rəsmi şəxslər qarşılayıblar...”

İBRAHİM