Roi Kehat: “Müdafiəçi cərimə meydançası daxilində ayağıma vurdu...”

“Sumqayıt”ın yarımmüdafiəçisi Roi Kehatın Futbolxeber.az saytına müsahibəsi

- Ardıcıl məğlubiyyətlərdən sonra səfərdə “Neftçi” ilə heç-heçə etdiniz. 1:1-lik bərabərliyi necə şərh edərdiniz?

- Səfərdə “Neftçi”yə qarşı ağır bir oyun keçirdik. Ardıcıl məğlubiyyətlərdən sonra pis gedişatı dayandırmaq istəyirdik. Xal və xallara çox ehtiyacımız var. Pis oynamadıq. Hesabda da önə keçdik. Oyunumuz barədə yaxşı sözlər demək olar. Mövsümün geridə qalan hissəsinə baxanda bu dəfə yaxşı görünürdük. Bu mübarizə əzmini digər oyunlarda da əks etdirməliyik.

- Demək olar ki, “Sumqayıt” 1 xal qazanmadı, 2 xal itirdi?

- Hesabı sən açırsansa, düşünmək olar ki, 2 xal itrmisən. Lakin düzünü desək, 1:1-dən sonra “Neftçi”nin də qol vurmaq üçün şansları var idi. Epizodların birində Mehdi əla qurtarışla komandamızı qoldan xilas etdi. Nəticəni ədalətli sayıram.

- Yerdə qaldığınız epizod kənardan penaltiyə oxşayırdı...

- Özünüz hər şeyi görürsünüz. Hakimlər barədə konkret nəsə demək istəmirəm.

- Etiraza görə sarı vərəqə ilə cəzalandırıldınız. Həmin anda hakimə konkret nə dediniz?

- Hiss elədim ki, müdafiəçi cərimə meydançası daxilində ayağıma vurdu. Hakimə bunu bildirdim. O isə mənə sarı vərəqə göstərdi.

- “Sumqayıt” “Neftçi”yə qarşı göstərdiyi futbolu əvvəlki matçlarda nə üçün nümayiş etdirə bilmirdi?

- Bəzən komandalarda uğursuz period olur. Bir qədər üzüaşağı gedirsən. Belə hallarda xarakter göstərməli, mübarizə aparmalısan. İnanıram ki, növbəti turlarda daha yaxşı çıxış edəcəyik.

- Komandanın nəticələri uğursuz olanda müxtəlif söz-söhbətlər də yayılır, danışılır. “Sumqayıt”da maaşların gecikdiyi və uğursuzluğun bununla əlaqədar olduğu deyilir. Bu, nə dərəcədə həqiqəti əks etdirir?

- Təbii ki, doğru deyil. Həm də biz hər birimiz peşəkar futbolçularıq. Sən meydana çıxırsansa, fikrin yalnız oyunda olmalıdı və komandanın uğuru üçün əlindən gələni etməlisən.

- Növbəti turda “Qarabağ”ı qəbul edəcəksiniz. Bu komanda ilə Sumqayıtdakı son matçda qələbə qazanmışdınız. Eyni nəticəni təkrarlamaq nə dərəcədə realdır?

- “Qarabağ” Azərbaycanın ən yaxşı komandasıdır. Gücü hər kəsə məlumdur. Ona görə də bizi həddindən artıq çox çətin oyun gözləyir. Bəli, ötən mövsümün sonlarında onlara qalib gəlmişdik. Bu dəfə də eyni nəticəni qazanmaq üçün çox çalışmalıyıq. Rəqibdən xal almaq üçün 100 faiz gücümüzü meydanda qoymalıyıq.

İbrahim Cəfərov