Qorka Laruçça: “Penalti oyunun qırılma nöqtəsi idi”

“Səbail”in yarımmüdafiəçisi Qorka Laruççanın Futbolxeber.az saytına müsahibəsi

- “Araz-Naxçıvan”la oyuna yaxşı başlasanız da, ikinci hissədə ardıcıl qollarla uduzdunuz. 2:3 hesablı yenilgini necə şərh edərdiniz?

- Oyuna yaxşı başlamışdıq. Hücumda və müdafiədə fəal idik. Daha çox hücum etmək istəyirdik. Düzdür, bəzi səhvlərimiz də olurdu. İlk hissədən sonra hesabda öndə idik. Fasilədən sonra oyunun gedişatı dəyişdi. Niyə bu qədər səhvə yol verdiyimizi bilmirəm. Amma ardıcıl səhvlər oldu. Rəqib qısa müddət ərzində 2 qol vurdu. Bundan sonra özümüzə gələ bilmədik. Halbuki nəticə fərqli ola bilərdi.

- Adətən “Səbail” fasilədən sonra daha yaxşı oynayır. Amma bu dəfə birinci ilə müqayisədə ikinci hissədə zəif təsir bağışladınız. Bunu nə ilə əlaqələndirmək olar?

- İkinci hissədə pis oynadığımızı düşünmürəm. Yalnız hissənin əvvəlində, maksimum 10 dəqiqə ərzində zəif təsir bağışladıq. Fikrimcə, penalti oyunun qırılma nöqtəsi idi.

- Bu, “Səbail”in ardıcıl 4-cü məğlubiyyət oldu...

- Bəli, ardıcıl 4 turdur uduzuruq. Amma yenə deyirəm, bu matçlarda pis oynadığımızı düşünmürəm. Yaxşı heyətimiz, yaxşı komandamız var, qollar da vururuq. Başa düşmürəm ki, niyə uduzuruq. Hər dəfə sonda nəticə istədiyimiz kimi olmur. Mən də istəmirəm belə davam etsin. Səhvlərimizdən nəticə çıxarmalıyıq.

- “Qara zolaq” nə vaxta kimi davam edəcək?

- Dəqiq söz demək çətindir. Çünki gələcəyi görə bilmirəm. Amma əlimizdən gələni etməliyik ki, tezliklə bu vəziyyətdən çıxaq. Çünki ardıcıl uduzmaq heç də xoş deyil.

- İlk dövrənin son turunda “Şamaxı” ilə qarşılaşacaqsınız. Ardıcıl məğlubiyyətləri nəzərə alsaq, qarşıdakı matçı “Səbail” üçün finala bərabər saymaq olar?

- Həqiqətən də bizim üçün çox vacib oyundur. “Şamaxı”ya mütləq qalib gəlməliyik. Geridəki turlarla müqayisədə daha yaxşı oynamalı, daha az səhvlərə yol verməliyik. Həftə boyu daha çox çalışacağıq. Səhvlərimiz üzərində işləyəcəyik. Bir qələbə bu vəziyyətdən çıxmağımıza kömək ola bilər. İnanıram ki, “Şamaxı”ya qalib gələ bilərik. Qol vurmaqla bağlı problemimiz yoxdur. Sadəcə kiçik səhvlərdən dolayı uduzuruq.

Fərəc Aslanov