Rəşad Sadıqov: “Sabah meydanda ən güclü “Osiyek”i gözləyirik”

“Başa düşürük ki, sabah bizi vacib oyun gözləyir. İlk görüşümüz səfərdədir. Rəqib doğma meydanda çalışacaq ki, sərfəli nəticə əldə etsin. Biz də oyuna eyni istəklə çıxacağıq”.

Futbolxeber.az saytının məlumatına görə, bu sözləri "Zirə"nın baş məşqçisi Rəşad Sadıqov UEFA Konfrans Liqasının 3-cü təsnifat mərhələsinin ilk oyunu çərçivəsində səfərdə "Osiyek"ə qarşı keçiriləcək qarşılaşma barədə danışarkən deyib.

O, komandasının əlindən gələni edəcəyini bildirib: “Yaxşı komandaya qarşı oynayacağıq. "Osiyek" maraqlı, baxımlı futbol oynayan komandadır. Böyük azarkeş dəstəyi olan komanda ilə qarşılaşacağıq. Düşündüklərimizin alınması üçün əlimizdən gələni edəcəyik”.

Sadıqov rəqibi yaxşı tanıdıqlarını vurğulayıb: “Maraqlı bir təsadüf var. Bundan əvvəlki rəqibimizi təhlil edərkən onların "Osiyek"lə yoxlama görüşlərini analiz etmişdik. Artıq ona görə rəqibi yaxşı tanıyırdıq, müəyyən məlumatımız var idi. Amma təbii ki, püşkdən sonra onları daha dərindən təhlil etməyə çalışdıq. Bu səviyyədə rəqiblərdən meydanda hər an manevr, həmlə gözləyirsən. Bizim verdiyimiz reaksiyalar çox önəmli olacaq”.

Mütəxəssis hər iki komandanın cavab oyununda bir-birinə daha yaxşı bələd olacağını söyləyib: “Gücümüzü bir-birimizin üzərində hiss edəcəyik. İkinci matç həlledici olacaq. Komandalar daha hazırlıqlı olacaq. Hər ikimizi çempionatda derbi oyunu gözləyir. Biz "Sabah"a, "Osiyek" isə "Dinamo"ya qarşı oynayacaq. Amma artıq pley-offun bir addımlığındayıq. Hər iki komanda üçün prioritet avrokubok matçı olacaq”.

R.Sadıqov Xorvatiya təmsilçisinin həftə sonu ölkə çempionatında məğlub olmasına belə münasibət bildirib: “Oyun çox maraqlı məcrada keçdi. Rəqib "Şibenik" meydanda əzmkar mübarizə apardı. Buna baxmayaraq, "Osiyek" üstünlüyə yiyələnirdi, dominantlıq edirdi. Sabah meydanda ən güclü "Osiyek"i gözləyirik”.