Ayxan Abbasov: “Çətin olacaq, amma yaxşı komanda quracağıq”

“Şamaxı”nın yeni baş məşqçisi Ayxan Abbasovun Futbolxeber.az saytına müsahibəsi

- Ayxan müəllim, təbrik edirik, təyinatınız artıq rəsmiləşdi. Lakin “Şamaxı” müqavilə müddətini hələ açıqlamayıb.

- Təşəkkür edirəm. Müqavilə müddəti 1 ildir.

- Adətən siz uzunmüddətli plan üzrə çalışırsınız. Əvvəlki iş yerlərinizdə bunu görmüşük. Bu dəfə “Şamaxı” ilə yalnız 1 illik müqavilə imzalamanızın səbəbi nədir?

- Bu, başlanğıcdır. Bizdə müqavilələr şərti olur. Bu il üzərimizə böyük iş düşür. Sonra oturub danışacağıq.

- Qarşınıza hansı məqsəd qoyulub?

- İlk növbədə yaxşı komanda qurmalıyıq. Bilirik ki, “Şamaxı” I Liqadan gəlib. Yeni mövsüm Premyer Liqada qalmaq uğrunda mübarizə aparmaq lazımdır. Çətin olacaq. Ancaq inşallah yaxşı komanda quracağıq. Əsas məqsəd möhkəm komanda qurmaq və çempionatda yerimizi möhkəmlətməkdir.

- Köməkçilərinizi kimlər olacaq?

- Köməkçilərim məsələsi sabah tam aydın olacaq. Böyük ehtimalla, “Turan Tovuz”dakı köməkçilərimin hamısı “Şamaxı”da da mənimlə birgə olacaqlar.

- Komandaya legioner cəlb edəcəksinizmi? Çünki ancaq yerlilərlə mübarizə aparmaq çox çətin olar.

- Bu məsələni müzakirə etmişik. Klubun da öz baxışı var. Yeni mövsümdən komandaya legionerlər cəlb olunacaq. Büdcəmizə uyğun heyət quracağıq.

- “Turan Tovuz”dan tanıdığınız futbolçulardan kimlərisə “Şamaxı”da görə biləyəcik?

- Tək “Turan Tovuz”dan yox, ümumən tanıdığım futbolçularla işləmək hər zaman xoşdur. Çünki onlar məni, mən də onları tanıyıram. Bu gün yerli bazarda vəziyyət çətindir. Düzünü demək lazımdır ki, bu gün yaxşı yerli futbolçu tapmaq asan deyil. Çox çətinliklər var. Tam olmasa da, çalışacağıq ki, bizə lazım olan futbolçuları heyətə cəlb edək.  

- Son günlər mətbuatda “Şamaxı”da maliyyə problemləri olduğu barədə xəbərlər yayılıb. İşə başlamamışdan əvvəl belə məlumatların yayılması sizi narahat edirmi?

- Mən bildiyim qədəri ilə müəyyən yaşanan sıxıntılar klubdan asılı olmayan səbəbdən yaranıb. Bu gün gecikmələr Premyer Liqada da var. Bilirik ki, Premyer Liqanın bir neçə klubunda həm mükafatlar, həm də son ayın maaşı verilməyib. Bu, klublardan asılı olmayan məsələdir. Təbii ki, “Şamaxı” rəhbərliyi ilə bütün bunları müzakirə etmişik. Dövlətdən ayrılan vəsait nə vaxt gəlirsə, klublar da o zaman ödəmə edirlər. İnşallah bütün borclar ödəniləcək, heç bir problem olmayacaq.

İbrahim CƏFƏROV