Kimdir müqəssir?

“2022-ci ildə qazandığımız titulu qorumaq istəyirik. Bu, əlbəttə ki, çətin olacaq. Amma əlimizdən gələni edirik, milli komandamız üçün hər cür şərait yaratmışıq”.

Bu sözləri Azərbaycan Minifutbol Federasiyasının vitse-prezidenti Taleh Nəsibov Avropa çempionatı ərəfəsində jurnalistlərə müsahibəsində demişdi.

Azərbaycan minifutbolunu yaxından təqib edən, son ölkə çempionatını mütəmadi izləyən iki jurnalistdən biri kimi (digəri həmkarım Mirbağır Cəfərlidir), təsdiqləyə bilərəm ki, bəli, Azərbaycan Minifutbol Federasiyası - istər Taleh bəy, istər federasiya prezidenti Orxan Məmmədov milli komandamızın uğur qazanması üçün hər bir şeyi edir.

Azərbaycan dünyada bəlkə də minifutbola ən çox diqqət ayıran ölkədir. Böyük turnirlər öncəsi komandanın xarici ölkələrdə təlim-məşq toplanışının keçirilməsi, ölkə daxilində yüksək səviyyəli hazırlıq, həvəsləndirici mükafatlar və s. və i.a. Siyahını çox uzatmağa ehtiyac yoxdur. Uzun sözün qısası, federasiya ölkədə minifutbolun inkişafı, yığmamızın uğur qazanması üçün hər şeyi edir. Amma təəssüf ki, son 2 ildə millimiz ümidləri tam doğrultmur. Görünən odur ki, 2022-ci ildə qazanılan Avropa çempionluğunun ardı gəlmir. Bu isə o deməkdir ki, nələrsə dəyişməlidir...

Millimiz əvvəlcə ötən il Bakıda Ulu öndər Heydər Əliyevin 100 illik yubileyinə həsr olunmuş Beynəlxalq Minifutbol Turnirində medalçılar sırasına düşə bilmədi. Eyni ssenari dünya çempionatında da təkrarlandı. Düzdür, yığmamızın ilk dəfə qatıldığı mundialda 4-cü yeri tutmasını pis nəticə kimi qələmə vermək olmaz. Lakin görünən odur ki, millimiz üzüaşağı gedir. Elə dünən Avropa çempionatının 1/4 finalında Qazaxıstan millisindən alınan məğlubiyyət də bunu sübut edir. Son Avropa çempionu, dünya reytinqində ikinci yerdə qərarlaşan komanda qitə birinciliyində ən güclü 4 komanda arasına düşə bilmirsə, deməli, komandada nəsə qaydasında deyil. “Bəxtimiz gətirmədi”, “Penaltilər lotereyadır”, “Oyun boyu qazaxlardan üstün idik” və s. - bütün bunlar bəhanədən başqa bir şey deyil. Əminəm ki, dünən penaltilər seriyasında qazaxları məğlub etsəydik, oyundan sonra heç kim “bəxtimiz gətirdi”, yaxud “penaltilər seriyası lotereyadır” deməyəcəkdi... Avropa çempionatında beşinci olmağı nəticə kimi qələmə vermək isə təsəllidən başqa bir şey deyil... Bakıda keçiriləcək Dünya çempionatına 1 il qalmış hazırkı gedişat millimiz üçün yaxşı perspektiv vəd etmir...

İbrahim CƏFƏROV