“Neftçi”nin futbolçusundan hörmətsizlik - “Sabah”ın formasında şəkil paylaşdı

“Neftçi”nin qızlardan ibarət komandasının kapitanı Aysun Seydiyeva kluba qarşı hörmətsizlik edib.

Futbolxeber.az saytının məlumatına görə, 27 yaşlı futbolçu Azərbaycan Premyer Liqasının sonuncu – 36-cı turu çərçivəsində dünən keçirilən qalmaqallı “Neftçi” - “Sabah” oyunundan sonra sosial şəbəkə hesabında rəqib komandanın formasında fotosunu paylaşıb.

Bəli, Aysun xanımın həyat yoldaşı Amin Seydiyev “Sabah”ın futbolçusudur. Bu, anlaşılandır. Lakin o, həyat yoldaşının təbrik etmək üçün başqa yol da seçə bilərdi. Hər halda dünən “Neftçi” məhz “Sabah”a uduzaraq avrokuboklardan kənarda qalıb. Bu cür həssas, klub üçün gərgin bir məqamda “Neftçi”nin formasını geyən futbolçunun rəqib komandanın formasında şəkil paylaşması heç bir çərçivəyə sığmır.

Aysun Seydiyevanın bu addımı “Neftçi” azarkeşləri tərəfindən də ciddi narazılıqla qarşılanıb. Onlar “Neftçi”nin formasını geyən oyunçunun rəqib komandanın formasında şəkil paylaşmasını klub rəhbərliyinin zəifliyinin əlaməti kimi dəyərləndirirlər.