Riad Rəfiyev: “Bu komanda, bu şəhər, bu azarkeş avrokuboklara layiq idi”

“Möhtəşəm hisslərdir. Son 5 ildə üçüncü dəfə avrokuboklara vəsiqə qazanırıq”.

Futbolxeber.az saytına açıqlamasında bu sözləri "Sumqayıt”ın prezidenti Riad Rəfiyev deyib.  

O, “Sumqayıt”ın avrokuboklara layiq olduğunu bildirib: “Bu komanda, bu şəhər, bu azarkeş avrokuboklara layiq idi. Özünüz də gördünüz ki, stadionda anşlaq yaşandı. “Sumqayıt”ın avrokuboklara vəsiqə qazanması layiqli nəticədir. Oynadığımız futbolla bunu sübut etdik. Uşaqların hamısını öpürəm, bağrıma basıram”.

R.Rəfiyev qeyd edib ki, futbolçular meydana mükafata görə çıxmayıblar: “Uşaqlar özləri hər şeyi başa düşürdülər. Mövsümün əvvəlindən layiqincə mübarizə apardıq, vuruşduq. Bu gün layiqli yerimizi tutmuşuq və avrokuboklara gedirik”.

Klub rəhbəri “Sumqayıt”ın avrokuboklar öncəsi güclənəcəyini bildirib: “Əlbəttə ki, transferlər olacaq”.

Fərəc ASLANOV