“Neftçi”nin hücumçusu: “İnanıram ki, “Qarabağ”ı da keçəcəyik”

“Vəzifəmiz mərhələ adlamaq idi. Bunun da öhdəsindən gəldik. Artıq növbəti matçlar barədə düşünməliyik”.

Futbolxeberaz saytına müsahibəsində bu sözləri “Neftçi”nin hücumçusu Yeqor Boqomolski Azərbaycan kubokunun 1/4 final mərhələsinin "Sumqayıt"la cavab oyunu (1:1, ilk oyun - 3:2) barədə danışarkən deyib.

Belaruslu hücumçu yarımfinalda “Qarabağ”ı da mübarizədən kənarlaşdıracaqlarına inanır: “Şansımız var. Cütün taleyini 2 matçdan ibarətdir. İnanıram ki, “Qarabağ”ı da keçəcəyik. Əlimizdən gələni edəcəyik ki, finala yüksələk”.

24 yaşlı forvard çempionatda da sona kimi mübarizə aparacaqlarını bildirib: “Kuboku qazanmaq istəyirik. Lakin bu o demək deyil ki, çempionat bizim üçün əhəmiyyətsizdir. Düzdür, Premyer Liqada “Qarabağ”la xal fərqi çoxdur. Bununla belə, təslim olmuruq. Son tura qədər mübarizə aparacağıq”.

Boqomolski kuboku qazanmaq istəklərini həm də Avropa Liqası ilə əlaqələndirib: “Konfrans Liqası ilə müqayisədə Avropa Liqasında çıxış etmək yaxşıdır. Bu, daha səviyyəli turnirdir. Həm də Avroliqaya qatılmaqla daha çox oyun keçirmək şansımız olacaq. Bunun üçün bütün gücümüzü səfərbər edəcəyik”.

“Neftçi”nin hücumçusu komandadakı vəziyyətdən də söz açıb: “Bojoviçin gəlişindən sonra komandada ab-hava yaxşıdır. Atmosfer düzəlib. Hamı optimistdir. Oyundan oyuna irəli getməyə çalışırıq”.

Fərəc ASLANOV