Renat Dadaşov “Hatayspor”da

Milli komandamızın hücumçusu Renat Dadaşov İsveçrənin “Qrasshopers” klubundan ayrılıb.

Futbolxeber.az saytının məlumatına görə, 24 yaşlı futbolçu karyerasını Türkiyə Superliqasında davam etdirəcək. O, “Hatayspor”la anlaşıb.

Dadaşov artıq İsveçrə klubunun düşərgəsini tərk edərək, Türkiyəyə yollanıb. Bu səbəbdən də Dadaşovun adı dünən ölkə çempionatının altıncı turunda “Lozanna”ya qarşı keçirilən matçın iştirak ərizəsinə daxil edilməyib.

“Hatayspor”un Renatın keçidini tezliklə açıqlayacağı gözlənilir.

Qeyd edək ki, Türkiyə Superliqasının IV turu çərçivəsində bu gün öz meydanında “Adana Demirspor”u qəbul edəcək “Hatayspor” 3 oyundan sonra 5 xalla 8-ci pillədə qərarlaşıb.