Ayxan Abbasov: “Riskə gedəcəyik”

"Azarkeşlərimiz bu gün möhtəşəm idilər. Ağır oyun oldu, ağır qrafikdəyik. Hər oyun zədəlilərin sayının artması bizi narahat edir".

Futbolxeber.az saytının məlumatına görə, bu sözləri "Turan Tovuz"un baş məşqçisi Ayxan Abbasov Azərbaycan Premyer Liqasının 31-ci turunda bu gün evdə "Sabah"a uduzduqları oyundan sonra mətbuat konfransında deyib.

O, 0:2 hesablı məğlubiyyəti belə şərh edib: "İki cəbhədə vuruşmalıyıq. Oyun pis alınmadı. Amma rəqibin ustalığı öz sözünü dedi. Əllərinə düşən epizodları qola çevirdilər. Bizim də epizodlarımız oldu, sadəcə sonluq çatmadı. Sıx qrafikdə rotasiyaların olması normaldır. Kubokda şansımız var. Bilirik, çox çətin olacaq. Cavab görüşünə tam gümrah getmək istəyirik. Buna görə rotasiyalar etdik".

A.Abbasov komandasının 8 oyundur qalib gələ bilməməsi haqda da danışıb: "Biz də hesablayırıq, turnir cədvəli ilə yaşayırıq. Çünki bilirik bizi qarşıda nə gözləyir. İki tur əvvəl də demişdim ki, hələ təhlükəli yerdəyik. Lazım olan oyunlarda qələbə qazana bilmədik. Bundan əvvəlki turlarda bir qələbə bizi rəqiblərdən aralayırdı. Qarşıda matçlar var. Evdə "Səbail" və "Neftçi" ilə oynayacağıq. Kubokdan sonra tam olaraq çempionata köklənəcəyik. Sona qədər mübarizə gedəcək. Futbolçularıma inanıram. Aşağı pillələr ola bilər. Amma əsas məqsəd Premyer Liqada qalmaqdır. Bunun üçün çalışacağıq. Kubokun yarımfinalına çıxmışıq. Riskə gedəcəyik, getməliyik".

Baş məşqçi "Neftçi" ilə kubokun cavab matçından öncə zədəli futbolçularının durumu haqda danışıb: "Milnerin durumu kritikdir. Oynamaq şansı azdır. Müalicəsi davam edir. Piruzi Marakvelidze ilə Şəhriyar Əliyevin durumu yaxşılığa doğru gedir. Qalan futbolçularımız yaxşıdır.  Tərlan Əhmədlinin əzələsində dartılma var. Bu gün Kamal Bayramovun da cəzası var idi. Mehman Hacıyev ilk oyununa çıxdı. Kubokda Kamal oynaya biləcək".