“Sabahın ulduzları” turniri başladı

Bakı Futbol Federasiyasının iki yaş qrupu üzrə təşkil etdiyi IХ “Sabahın ulduzları” paytaxt çempionatı 24 komandanın iştirakı ilə start götürüb. Futbolxeber.az-ın məlumatına görə, turnirdə “İnter” PİK-in 2001-2002-ci il və 2003-2004-cü il təvəllüdlü futbolçulardan ibarət 3 komandası mübarizə aparır. Qeyd edək ki, 2003-2004-cü il təvəllüdlü futbolçulardan ibarət komandalar A və B qrupunda yarışacaqlar. BFF-nin Mətbuat Xidmətindən aldığımız məlumata görə, 2001-2002-ci il təvəllüdlü futbolçulardan ibarət komanda ilk turda “Sumqayıt”la qarşılaşıb və oyun 5:0 hesabıyla “İnter”in xeyrinə başa çatıb. Komandamızn heyətində  Ceyhun Nuriyev, Əli Nəzərov, Qafar Novruzov(2) və Miqdar Məmmədov fərqləniblər.

 2003-2004-cü il təvəllüdlü futbolçuların mübarizə apardığı A qrupunda “İnter” ilk tura qələbəylə başlayıb. Belə ki, komanda  “Qarabağ” FM ilə qarşılaşıb və “İnter” rəqibini 3 cavabsız qolla məğlub edib. Komandanın qələbə qollarını Nihat Fərəcli(2) və Vüsal Qəmbərov vurublar.

Eyni sözləri B qrupunda mübarizə aparan “İnter ulduzları” haqqında da demək olar. Belə ki, “Buzovna” ilə qarşılaşan komanda rəqibin qapısını 4 dəfə titrətməyə müvəffəq olub. “İnter ulduzları”nın heyətində Əli Tağıyev (2), Əzim Quliyev və Anar Qəniyev fərqləniblər.

Xatırladaq ki, oyunlar "Şəfa" stadionunda keçirilir.