Jurnalistlər Premyer Liqamızın oyunlarına buraxılacaqmı?

Koronavirus (COVİD-19) pandemiyası ilə əlaqədar Azərbaycan Premyer Liqası, Azərbaycan I Divizionu və Azərbaycan Kuboku yarışlarına verilən müvəqqəti fasilə mayda başa çatacaq.

Hələ bir neçə gün əvvəl mayın 21-də I Divizionun, mayın 23-də isə Premyer Liqanın bərpa olunması nəzərdə tutulduğu bəyan edildi.

Yayılan açıqlamada o da vurğulandı ki, Premyer Liqa, I Divizion və Azərbaycan Kubokunun oyunları azarkeşsiz keçiriləcək. Bəs jurnalistlər necə, oyunlara buraxılacaqmı?

Peşəkar Futbol Liqasının İnformasiya və İctimaiyyətlə Əlaqələr Departamentinin rəhbəri Aslan Şahgəldiyev Futbolxeber.az saytının bu məsələ ilə bağlı sualını belə cavablandırdı:

“İndidən bu haqda dəqiq fikir bildirmək olmaz. Bu məsələyə mayın 4-dən sonra aydınlıq gələcək. Lakin hazırkı duruma görə deyə bilərəm ki, çox güman jurnalistlərin oyunları izləməsində problem olmayacaq”.