Adrian Pit: "Baş məşqçini futbolçular yox, prezident dəyişir"

"Makkabi" ilə oyundan sonra "Xəzər Lənkəran"dan uzaqlaşdırılan Adrian Pit Futbolxeber.az saytına müsahibə verib. 

- Komandada nə baş verir? Səninlə bağlı nə problem var?

- Problem ondadır ki, biz uduzmuşuq.

- İndi haradasan?

- Bakıda.

- Artıq komandadan kənarlaşdırıldığın bəllidir. Toşak bu haqda sənə nə dedi?

- Bazar ertəsi klubun ofisində görüşüm var.

- Kiminlə görüşəcəksən?

- Klubun prezidenti ilə. Həmin görüş zamanı hər şeyə aydınlıq gələcək. Hələ ki klubdan ayrılmamışam. Bazar ertəsi yəqin ki məsələyə aydınlqı gələcək. 

- "Xəzər Lənkəran"la olan müqavilən hələ qüvvədədir?

- Hə, komanda ilə 1 illik müqaviləm var.

- Yəqin ki, komandadan ayrılası olsan, müqavilən olduğuna görə "Xəzər Lənkəran"dan kompensasiya tələb edəcəksən?

- Bazar ertəsi klub rəhbərliyi ilə görüşdən sonra sənə hər şeyi ətraflı danışaram. Çünki hələlik heç nə məlum deyil.

- Komandaya qayıtmağın da mümkündür?

- Gəlin, tələsməyək və bazar ertəsini gözləyək.

- Toşakla aranızda nə problem var?

- Mənim nəinki Toşakla, ümumiyyətlə heç kimlə problemim yoxdur.

- Əgər, aranızda problem yoxdursa, Toşak nəyə görə səni komandada görmək istəmir?

- Bunu birbaşa Toşakdan soruşmalısan, məndən yox.

- Toşak açıqlamasında deyib ki, komandadan göndərilən futbolçular özlərini peşəkar kimi aparmırdlılar. Hətta bildirib ki, mən onlara göndərildiklərini deyərkən, susdular, veclərinə də olmadı...

- Bunu kim deyib?

- Kim deyəcək, əlbəttə ki Toşak.

- Biz bu haqda bazar ertəsi danışarıq.

- Belə fikirlər səslənir ki, bəzi futbolçular Toşakı baş məşqçi postunda görmək istəmirlər və bu səbəbdən də "Makkabi" ilə oyunda qəsdən zəif oynayıblar ki, komanda biabırçı hesabla uduzsun, Toşak da istefaya göndərilsin...

- Bu haqda heç bir məlumatım yoxdur. Həm də komandada baş məşqçini yalnız 1 nəfər dəyişə bilər - prezident. Məşqçini futbolçular dəyişmir.

Elman MƏHƏRRƏMOV