Elhad Nəziri: "Komanda qol buraxmayıbsa, deməli müdafiə xətti işinin öhdəsindən gəlib"

"Oyunumuz yaxşı alındı. Çox şükür ki, evdə olduğu kimi səfərdə də qələbə qazandıq. Artıq bu oyun geridə qaldı. İndi qarşıdakı oyunlarda da uğur qazanmağa çalışacağıq". Futbolxeber.az saytına verdiyi açıqlamada bu sözləri millimizin və Rumıniyanın "Petrolul" klubunun üzvü Elhad Nəziri deyib.

Avroliqanın II təsnifat mərhələsi çərçivəsində səfərdə "Vikinqur"a qarşı keçirilən oyunda 90 dəqiqə meydanda olan həmyerlimiz öz oyunu haqda bunları deyib: "Əgər, komanda qol buraxmayıbsa, deməli müdafiə xətti işinin öhdəsindən gəlib. Böyükhesablı qələbə qazandıq. Yəqin ki, oyunumuz həm məşqçilərin, həm də azerkeşlərin ürəyincə olub".

İlk dəfə Avroliqa oyununda meydana start heyətində çıxan Nəziri həyəcanlanmadığını söyləyib: "Əvvəlcədən oynayacağımı bilirdim. Hər şey normal idi. Həyəcan qətiyyən yoxdu. Oyunum barədə məşqçilər daha yaxşı bilər. Avropada oynayıram, öz üzərimdə daha çox çalışmalıyam. Nə əksiklərim varsa, onu düzəltməyə çalışacağam. Ümumi götürdükdə, oyunumum yaxşı alındığını düşünürəm".