Hüseyn Cəbrayıloğlu: "Toşak istefa verməyi düşünsə də..."

Avropa Liqasının II təsnifat mərhələsinin cavab oyununda evdə İsrailin "Makkabi" klubundan ağır zərbə alan "Xəzər Lənkəran"ın baş məşqçisi Con Toşak matçdan sonra əşyalarını toplayıb və klubun bazasını tərk edərək, vətəni Uelsə yollanıb.

Mətbuatda yayılan xəbərə görə, o, anasının ağır xəstə olmasını və günlərdi yataqda qaldığını bəhanə gətirərək, Britaniyaya yola düşməyə qərar verib. Onun nə vaxt geri dönəcəyi açıqlanmır.

Məsələyə aydınlıq gətirmək üçün klubun mətbuat xidmətinin rəhbəri Hüseyn Cəbrayıloğlu ilə əlaqə saxladıq. Publika.Az-a açıqlama verən klub rəsmisi xəbəri təkzib edib:

“Toşak hazırda komandaya məşq keçir. Saat 10-da başlayan məşqə özü rəhbərlik edir” - deyə bildirdi.

Azarkeşlərini məyus edən “XL”-dəkilər üçün tribunadan istefa sədaları səsləndirilib. Toşak da oyundan sonra mətbuata açıqlamasında: “Məsuliyyəti öz üzərimə götürürəm. İstefaya gəlincə, indi pis vəziyyətdəyəm. Ola bilsin ki, bəzi futbolçular istefama sevinsin. Ola bilsin, baş məşqçi qaldı, həmin futbolçular getsin. Onlardan bəziləri əvvəldən göndərilməli idi”- demişdi. Bununla bağlı oyundan sona klub rəhbərliyi və baş məşqçi Toşak arasında hər hansı söhbətin olub-olmaması ilə də maraqlandıq:

H.Cəbrayıloğlu sualımıza belə cavab verdi: “Klub prezidenti Toşakla görüşüb nəticənin hesabatını soruşub. Toşak istefa verməyi düşünsə də, bu dəfə fərqli addım atılacaq. Belə ki, iki il öncə də Rednik dönəmində eyni hadisələr baş vermişdi. Ola bilməz ki, eyni komanda 1 həftə öncə səfər meydanına eyni rəqibə 0-2 hesabı ilə uduzur və 4 real qol vəziyyəti yaradır, Amma 1 həftə sonra evində, azarkeşləri önünüdə 0-8 məğlub olur. Bu mümkün deyil. Demək ki, hansısa futbolçular komandadan qovulmalıdır. Bu futbolçular aşkarlanıb tədbir görüləcək”.