AMADA əməkdaşının həmmüəllifi olduğu kitab fəsli nüfuzlu “Springer” elmi nəşrində çap olunub

Azərbaycan Milli Antidopinq Agentliyinin (AMADA) Elm, tibb və təhsil şöbəsinin müdiri, biologiya üzrə fəlsəfə doktoru gənc alim və Prezident mükafatçısı Səmra Mirzəyevanın həmmüəllifi olduğu “Smart Nano-Delivering Genetic Engineering for Agricultural Sustainability” (Kənd Təsərrüfatı Dayanıqlılığının Təmin Edilməsi üçün Ağıllı Nanoçatdırılma Əsaslı Gen Mühəndisliyi) adlı kitab fəsli nüfuzlu beynəlxalq elmi nəşri “Springer Nature” tərəfindən dərc edilib.

Futbolxeber.az saytına AMADA-dan verilən məlumata görə, sözügedən fəsil “AI-Nano-Enabled Climate-Smart Agriculture and Sustainability” (Süni intellekt və nanotexnologiyalara əsaslanan iqlimə davamlı və dayanıqlı kənd təsərrüfatı) adlı kitabın mühüm bölmələrindən birini təşkil edir. “Springer” tərəfindən nəşr olunan kitab süni intellekt və nanоtexnologiyanın kənd təsərrüfatında tətbiqini, ağıllı kənd təsərrüfatının inkişafını, iqlim dəyişikliklərinə davamlı bitkilərin formalaşdırılmasını və dayanıqlı kənd təsərrüfatı üçün innovativ biotexnoloji yanaşmaları əhatə edir.

Fəsil müasir nanobiotexnologiyanın bitki gen mühəndisliyi ilə inteqrasiyasına həsr olunub. Fəsildə nanodaşıyıcıların genetik materialların bitki hüceyrələrinə daha məqsədyönlü və səmərəli çatdırılmasında potensial imkanları, gen mühəndisliyi və müasir genom redaktəsi texnologiyaları, o cümlədən CRISPR/Cas metodu ilə nanоtexnologiyanın inteqrasiyası nəzərdən keçirilir. Bu yanaşmaların kənd təsərrüfatında məhsuldarlığın, bitkilərin xəstəliklərə və ətraf mühit streslərinə davamlılığının artırılması və daha dayanıqlı istehsal sistemlərinin formalaşdırılmasına töhfə vermək potensialı xüsusi əhəmiyyət daşıyır.

Kitabın ümumi konsepsiyası süni intellekt, nanоtexnologiya, genomika və biotexnologiyanın inteqrasiyası əsasında gələcəyin iqlimə davamlı və resurslardan daha səmərəli istifadə edən kənd təsərrüfatı modellərinin formalaşdırılmasına yönəlib. Nəşrdə nano-gübrələr, nano-pestisidlər, nano-sensorlar, biostimulyatorların effektiv çatdırılması, gen mühəndisliyi və CRISPR/Cas əsaslı genom redaktəsi kimi qabaqcıl istiqamətlər əhatə olunur.

Nəşr Çin Elmlər Akademiyasının Şimal-Şərqi Coğrafiya və Aqroekologiya İnstitutunun nəzdində fəaliyyət göstərən Soya Paxlasının Molekulyar Dizayn Seleksiyası üzrə Aparıcı Laboratoriya ilə elmi əməkdaşlıq çərçivəsində hazırlanıb.